Apuia Ralte hovin Bagan an champion

Inrinni zan khan Indian Super League (ISL) final khelh a ni a, Salt Lake Stadium a inkhel hmuhnawm takah Lalengmawia Ralte (Apuia) khelhna Mohun Bagan Super Giant chuan an khingpui Bengaluru FC chu 2-1 in an hneh a, ISL-ah a vawi li nan an champion.
Salt Lake Stadium-ah mipui thahnem tak pungkhawm hmaah Mualneitu Mohun Bagan in bul an tan tha lova, Bengaluru FC in hun rei tak chhung an nawr bet. Season liam taa final-ah Mumbai City FC laka lo tlawm tawh Mohun Bagan hian tlawm nawn tum lo viau mah se goal an chhuah hmasa tlat thung.
Inkhel hmuhnawm takah hial chawlhlawk hmain goal lut awm thei lo mah se chawlhlawk hnu lamah Bengaluru in goal an thun ta thuai thung. Second half tan atanga minute lina lekah mualneitu team an chesual a, Alberto Rodríguez chuan an lamah ti-goal in, mikhual team hmahruaina goal a thun sak. Bet zawk leh si phur zawk an nih vangin Mohun Bagan hi an tlawm mai a rinawm hman viau. Apuia khelhna Mohun Bagan hi goal an chhuah hnuin an khel tha ta sawt thung. Minute 72-naah penalty an hlawhchhuak a, Jason Cummings chuan penalty pet goal in an si phurh a sut a. Salt Lake Stadium-a mipui thawm a tha hle.
Goal khat ve ve an thun hnuin inkhel a hmuhnawm chhunzawm a, goal thun tumin team hnihte an innawr tawn nasa hle. Inkhel hmuhnawm takah goal a luh belh thei lawk lova, hun pangngaiah chak zawk an awm thei lo phawt. Hun pangngaiah chak zawk an awm theih loh hnuin extratime-ah Bagan in bul an tan tha ta viau thung. Mohun Bagan hian minute 96-naa Jamie Maclaren goal thun hmangin hma an hruai let. He goal hi hun tawp thlengin an venghim a, ISL-ah ropui takin an champion zui ta a. Mohun Bagan hi ISL-ah League leh Cup-a champion kawp hmasa ber a ni nghal nghe nghe.
India tualchhunga football club te inelna lian ber Indian Super League (ISL) ah hian Kolkata team lian Mohun Bagan hi vawi li an champion na a ni a. Atletico de Kolkata hmingin vawi hnih an champion tawh a, ATK Mohun Bagan hming puin vawi khat champion tawh bawkin, Mohun Bagan Super Giant tia an hming an thlak hnua a vawi khat nan inrinni zan khan an champion leh ta bawk.
ISL champion thar Mohun Bagan Super Giant-ah hian Mizo tlangval Lalenmawia Ralte chu player pawimawh tak a ni a. Semi-final-ah pui zeta chakna goal thuntu Apuia hi final-ah pawh a che tha hle nghe nghe. Apuia hian Mumbai City FC tan a khelh laiin ISL trophy a lo chawi tawh a, Mohun Bagan tan League leh Cup-ah a champion zui leh bawk a. Hei hian player ropui bik a nihzia a tilang.