Arsenal champion beiseina a tawp fel?

Inrinni zan khan Eglish Premier League (EPL) 2024-25 khelh chhunzawm a ni a, champion beisei zui thei tura chak mamawh Arsenal chu an mualah an chak zo lo. An khelh hnuhnung vawi hnihah an chak zawh loh zawn vangin Arsenal champion beiseina a tawp ang hiala ngaih a ni. Arsenal chak loh lai hian pathumnaa awm mek Nottingham Forrest pawh an tlawm leh. Forrest an tlawm lai hian champion lai Manchester City chuan an mualah awlsam takin hnehna an lo chang ve thung.
Arsenal 1-1 Brentford
EPL-a pahnihna ni mek a, hmahruaitu Liverpool nen an inkar tizim tura chak mamawh Arsenal hian Emirates Stadium-ah Brentford an mikhual. Liverpool nen an inkar tizim a, champion beisei zui thei turin chak mamawh viau mah se an mualah an chak zo lo va, Brentford nen hian 1-1 in an inhnehtawk.
An mualah chak ngei tuma tan khawh Arsenal hian khel tha viau mah se goal an thun thei lawk lo. Brentford lakah 3-0 ngawta Real Madrid hneh thei an nihna an lantir hleithei lo. Inkhel hmuhnawm pangngai takah goal lut a awm theih loh reng hnuin Arsenal in goal an thun hmasa. Minute 61-naah Thomas Partey chuan Gunners hmahruaina goal a thun.
An mualah goal thun hmasa zawk an nih vangin chak theih beiseina sang tak an nei hman. Goal thun belh tuma an khingpuite an nawr laiin an chesual ta tlat thung. Brentford tan hian Yoane Wissa chuan minute 74-naah goal thuin an si phurh a sut. Wissa goal thun hnu hian goal dang a luh belh thei tawh lova, chak mamawh Arsenal chu an mualah ngei uiawm takin an chak zo lo.
An mualah an chak zawh loh vangin Arsenal tan EPL champion nih beisei zui ngam a har tawh dawn. Gunners hian hmahruaitu Liverpool chu point khatin an hnaih hret naa Liverpool hian Pathianni zanah inkhel a hmachhawn vangi point 13 ngawta Arsenal nen an inkar tihzau theihna hun tha an nei. EPL-ah khelh hmabak a tlem tawh a, chak zel mamawh chunga an chak zawh loh zawn vangin Arsenal tan champion a harsa zual deuh deuh a, Gunners hian Liverpool champion hun an thlir a ni deuh tawp tawh.
Forrest an tlawm leh
Pathuamnaah insawh nghet a, champions league khel phak vat vat tura chak mamawh Nottingham Forrest an che chhe zawn a, inkhel an hmachhawn hnuhnung pahnihah an tlawm zawn. An tlawm zawn vangin Forrest hian UCL khelh phak tuma inelna hautak zawk an hmachhawn zui a ngai dawn.
Pathuamnaah insawhnghet tura chak mamawh Nottingham Forrest hian an mualah Everton tan mikhual. 14-naah awm mek Everton lakah chak ngei tum mah se an mualah an khel tha lo viau. Team hnihte hian minute 90 chhungin goal an thun thei lo ve ve a, an inhnehtawk ngei tura ngaih a ni hman. Inhnehtawk mai tura ngaih an nih hman laiin hun pek belh tawp dawn hnaiah mikhual team Everton an chefuh a, Abdoulaye Doucouré chuan minute 90+4-ah hmahruaina goal a thun. Doucouré goal thun hi Forrest in an sut thei tawh lova, an mualah uiawm takin an tlawm.
Everton laka tlawm Nottingham Forrest hian pathumna luah zui tho mah se Manchester City leh Aston Villa ten an hnaih chak viau thung a. Inkhel pakhat lek pawhin an dinhmun a thlak danglam thei hial tawh. Heti a nih vang hian insiamthat thuai an mamawh a. Champions League khel phak turin chak an mamawh na a sang tawh hle a ni. Season tharah EPL club pangain champions league an khel phak dawn a. Hei hi Nottingham Forrest hian an hlawkpui thei tura ngaih a ni tel tho thung.
City leh Villa an chak
Inrinni zana inkhel dangah Manchester City leh Aston Villa ten awlsam takin hnehna an chang a, top 4 huang luah tuma inelna boruak a ngaihnawm leh zual sauh.
Champion lai Manchester City hian Etihad Stadium-ah Crystal Palace an mikhual a, an mikhual lakah si an phurh hmasak zet hnuin 5-2 in hnehna an chang let.
Etihad Stadium-a lenglut Crystal Palace hian bul an tan tha viau a, Eberechi Eze chuan inkhel tan atanga minute 8-na lekah hmahruaina goal a thun nghal. Hma taka goal an thun hnuin City an khel tha chhunzawm a, minute 21-na lekah Chris Richards chuan an goal hnihna a thun belh zui leh zat. Mintute 21 chhung leka goal hnih an thun hman vangin Palace hian team lian lakah point hlawhchhuah an inbeisei sang hman hle.
’Si hnih an phurh hnuin City an khel tha ta tlat a, Kevin De Bruyne chuan minute 33-naah goal thunin an si phurh a sut then a. Minute 36-naah Omar Marmoush-a’n an si phurh a sut zova, 2-2 a inhnehtawk chungin chawlhlawk an hmang.
Chawlhlawk hnu lamah City an khel tha chhunzawm a, inhnaihchilh takin goal thum an thun. City tan hian Mateo Kovacic chuan minute 47-na lekah hma an hruai letna goal a thun a. Hemi hnu hian James McAtee leh Nico O’Reilly ten goal an thun belh zui leh a, 5-2 a an mikhual te lehthalin,palina an luah chhunzawm ta a ni.
City in 5-2 a hnehna an chan lai hian Aston Villa chuan 3-0 in tlahniam tawh Southampton an lo hneh ve bawk.