AR awmna chhehvela lo neitute harsatna thlen

AR awmna chhehvela lo
neitute harsatna thlen
Zokhawsanga Assam Rifles awmna chhehvela loneituten harsatna an tawh phah chu Congress Thalaiin AR hotute hnenah an thlen sak.
Congress Thalai Hqrs. thuchhuah danin, Zokhawsang leh a chhehvel ram – Sedaikawn, Ramthazawl, Khuangkhaului, Phivawklui, Lallozawl, Changelzawl, Aharram, Sangabawk leh Bulpui Zaua loneituten hun rei tak ata Zokhawsang ram hi feh kawng atan an lo hmang tawh a. Tunhnaiah Zokhawsang hi Assam Rifles Lakhimpur Battalion-in an awmna atana an cheibawl tak avangin feh kawng hi hman chhunzawm an phal loa, loneitu mi engemawzatin harsatna an tawk a, an harsatna tawh chu Assam Rifles thuneitute hnenah an thlensak tih a sawi a ni.
Lo hal zawh thlai chi thlak lai, loneitute tana hun pawimawh a nih avangin, an ngenna ang hian Assam Rifles thuneitute chuan thla hnih vel chhung chu ruahmanna an lo siam tur thu an lo hrilh tih Congress Thalai hian sawiin, ‘Battalion pakhat hmun tur anih avangin hunrei tak erawh an camp paltlang hi a rem dawn lo a. Hei vang hian loneituten harsatna an tawh chhunzawm loh na’n a rang thei ang bera ruahmanna siam turin Mizoram sawrkar kan ngen a ni,’ a ti.