Ar awpkeuna hmun tih len belh

Zoram Poultry Development Society (ZPDS) hnuaia arnote leh artui thar chhuahna hmunpui, ZPDS INDBRO Hatchery Farm Tanhril tihchangtlun thar chu Thawhtanni zing khan AH & Vety minister Er. Lalrinawma’n a hawng.
ZPDS Farm-in din a nih atanga tun thlenga sawrkarah chhiah engemawzat an chhunglut thei chu fakawm a tih thu minister hian a sawi a. Ran hrang hrang leh a kaihhnawih enkawl kawnga hma latu AH & Vety department-in tha taka mawhphurhna a hlen zel thin leh mipui tana ran chi tha zawk pek chhuah kawnga hmalakna chu lawmawm a tih thu a sawi. “Hei hian sa, artui leh bawnghnute thar kawnga intodelh tura ke pennaah awmze thui tak a nei a ni a, kan thahnemngaihna hi mipuiin a zar an zo zel a ni,” a ti.
ZPDS INDBRO Hatchery Farm Tanhril tihlen leh tihchangtlun hna hi NABARD RIDF- XXVI 2020- 2021 sum, nuai 533.76 senga thawh a ni a, building sak belh bakah hmanraw hrang hrang lei a ni. Special Assistance to State for Capital Expenditure (SASCE) 2021- 2022 sum nuai 445 sengin a ruhrel awmsa tihchangtlun kawnga pawimawh hrang hrang thawh a ni bawk.
Arsa leh artuia intodelh a nih theihna tura kum 1987-a din, Regional Broiler Chick Farm chu kum 2013- 2014 khan tih changtlun niin, Zoram Poultry Development Society INDBRO Poultry Hatchery Farm tih a ni. Hmarchhaka breeding farm awmchhun niin, breeder bikah chuan INDBRO Brown Layer leh INDBRO Rainbow Rooster enkawl an ni. He farm hian thiamna changkang – ar kahrai, cage system, automatic drinking system leh tui awpkeuna changkang (setting maching) artui nuai thum leng leh hatching machine kar khata arte nuai khat awpkeu theitea thuam a ni.
2015 May 18 atanga tun thlengin he farm hian artui 2570740 leh arte 1698100 a tharchhuak tawh a, Sawrkarah chhiah Rs. 32,85,679.89 a chhung lut tawh.