AR chhuahsan ramah Vanapa Hall MINECO hnaihah CMO sawn tum

Aizawla Assam Rifles chhuahsan tak ramah Vanapa Hall hming pu tho in hall lian zawk sak tum a ni a. Chief Minister Office chu MINECO hnaih AR-in an la luah lai ramah sawn tumin bawhzui zel a ni.
Assam Rifles ram chhuahsan hman dan ngaihtuah tura din pawl hrang hrang aiawh Advisory Committee chu an chairman, chief minister Lalduhoma hoin Nilaini khan an thukhawm a. A thurel zingah 2025 November 18-a an thutkhawm vawi 4-naa an rel tawh, “AR ram chhuahsan hmunhma leh building hman dilna lam reng reng Committee-ah chhawpchhuah tawh loh nise” tih chu kenkawh zel tum a ni.
Vanapa Hall chu a upat tawh avangin Assam Rifles insawn hma khan sawrkar chuan sak that a tum thu a lo puang tawh a. Assam Rifles insawn takah chuan hall lian leh changkang zawk sakna tur hmunhma a awm taa ngaih niin, Advisory Committee hian Convention Centre sak a lo pawm tawh chu Vanapa Hall hming puttir a rel a. Tuna Vanapa Hall hi chu sawrkarin a hmanna tur dang a ngaihtuah dawn a ni.
Chief minister hian Khatlaa AR ram mawng lam, MINECO bul hnai chu Chief Minister chenna leh CM Office sakna atan a dil thin a. CM Office leh Secretariat building inhlat taka a awm hian sawrkar meeting leh programme tam tak a kaltluang lo foa. Hun, tha leh sum sen a sang bawk, tih a ni. MINECO lama CM hmunhma sawn hi heng harsatna pumpelhna tha bera ngaih niin, Khatlaa AR ram joint survey chuan ram chuang (surplus) hectare khat chuang hlek a awm tih a lo hmuchhuak tawh a ni.
Kumin February 2-a chief minister leh AR director genral Lt. Gen Vikas Lakhera inkawmnaah Khatlaa Assam Rifles ram thenkhat, Tuikual Veng ep ram, MINECO main entrance ep atanga awlsam taka pawh phei theih chu sawrkar hnena an hlan theih tur thu chief minister a hrilh a, chak taka bawhzui mek a ni.
Chief minister chuan ram hman dan tur lungrual taka an relho thin avangin Advisory Committee member-te chungah lawmthu a sawi a ni.
Thutkhawma thurel leh sawi dangte:
8 Canteen Kuala Hari Mandir sawnna atan Loch House leh CHAN office inkarah ram pek a ni dawn a. Loch House chu a lan dan ti danglam loa cheithat an rel a, a lo hlut zual theihnan hman tangkai dan ngaihtuah tum a ni ang.
8 Aizawl lailia War Memorial pahnih – Canteen Kual leh Treasury Square ami chu Assam Rifles-in Khatlaa an ram chhunga sawn an tum thu sawi a ni.
8 AR chhuahsan ram china kawngpui tihzauh leh siamthatna tur sum sanction hi tun hnaiah hmuh a ni a. PWD-in hna an tan thei thuai dawn tih sawi a ni.
8 Invitees member – Association for Environmental Preservation chuan AR ram chhuahsan ram zau zawk (52.57%) a nihna anga humhalh tura ruahmanna siam a nih avangin Advisory Committee chungah lawmthu a sawi.
8 AR rama thingphun a, ramngaw nuam tak siamtu YMA Bethlehem Branch hnenah leh phal taka an ram sawrkara hlan lettute hnenah Advisory Committee chuan lawmthu a sawi nawn.