AR ram luaha LSC cancel turin NGOs-in sawrkar leh pass neitute nawr zui zel

AR ram luaha LSC cancel turin NGOs-in
sawrkar leh pass neitute nawr zui zel
	Aizawl lailia Assam Rifles ram luah chhunga mimal LSC awmte cancel a nih theihna'na Central YMA in Gauhati High Court-a public interest litigation (PIL) a thehluhah thutlukna a la awm lo.
	Thudawn danin Assam Rifles ram luah chhunga mimal LSC awm chungchanga PIL lut chu final hearing hmabak a ni a. Court-in a ngaihtuah hun tur erawh hriat theih a la ni loa, court thu ngaihchan mek a ni.
	NGO Coordination Committee thuchhuak chuan Aizawl hmun laili atangin an hmun thar Zokhawsangah Assam Rifles hi insawnchhuak thuai se a duh thu leh Assam Rifles luahlai ram chhunga felhlel leh dik lo taka LSC neite chu a rang thei ang bera ram leh hnam rilru pua an pass surrender turin a ngen nawn tih an sawi.
	'Mizo mipui tana helai hmun hi a awm zui zel theihna'n tuna pass neitute a rang thei ang berin sawrkarin cancel sak turin kan ngen a ni,' tiin, Assam Rifles chhuahsan tur ram chu mipui tana tangkai thei ang bera hman a nih theihna'n hma la turin NGO Coordination Committee chuan Mizoram sawrkar a ngen thu leh a tul anga sawrkar tawiawm zel a inhuam thu a sawi a ni.
	Assam Rifles ram luah chhungah hian mimal LSC nei 61 an awm a, heng zinga 8-in an LSC chu sawrkarah an an pe let tawh. Central YMA chuan AR ram luah chhunga mimal LSC nei an awm chu tha an tih loh avang leh AR-in an chhuahsan hunah mipui tana tangkai taka hman an duh avangin mimal LSC neiten sawrkarah an LSC pe let turin an lo ngen tawh a, LSC hi cancel a nih theih nan High Court-ah PIL an thehlut zui a ni.