Harsatna karah ram ro rel turin MNF ruat a ni – Zoramthanga

Harsatna karah ram ro rel turin
MNF ruat a ni - Zoramthanga
	Mizoramin harsatna kara rorel turin Pathianin MNF a ruat thin tih MNF president Zoramthanga chuan a sawi.
	Thawhlehnia Kolasib MNF Block Conference a hmanpuinaah Zoramthanga chuan, MNF sawrkar hmasaah Mautam hmachhawnin, tun sawrkarah hrileng bakah harsatna dang tam takin min tlakbuak a. Chutih laiin chhungkaw thahnem tak SEDP hmanga tuamhlawm niin, sem chhunzawm zel tur a ni tih a sawi.
	"Heng harsatna kara rorel tur hian Pathianin MNF hi a ruat thin. Assam nena ramri buai kan neihah sipai pakhat pawh hloh loin kan insaseng leh a. Inhnukkir tura min ngenna pawh, hnukkir tur chuan chief minister atanga ka chawlh hmasak a tul thu ka sawi avangin nawr chi ah min ngai ta lo a. Raltlan nawrkir tura central-in nasa taka min nawrna pawh pawisa loin, MNF sawrkar chuan House-ah kan tuamhlawm tur thu puangin kan humhim a ni," a ti. 
	Inthlanpui awm turah an khingpui ber thin Congress party chu beih tham pawh niloin, an tlinna tur a vang hle a, an artelukawn mai a hlauhawm hial ta niin MNF president hian a sawi. ZPM chu inthlan hmasaa an intih itawmna, Congress leh MNF ni lo an tih thin te, unit system tih bo an tih leh, movement kan ni, an tihte chu a dik loh zia hmuh a ni ta vek tih sawiin, "Itawm thei ang bera an inzuar chung pawhin seat 10 an la tling lo. Kalphung thar an tih hi vawi tam an thlak tawh a. Ram development aupui tur an neilo a, an hruaitute buai avangin beih pawh ngailoa buai sa an ni. Bial tinah thu hnih neiin candidate pahnih pathum an tiam zung a, sawrkar lai hnathawh that chinpawr leh sawichhiat bak thiam an neilo," a ti.
	Heng avangte hian inthlanpui awm leh turah MNF a sawrkar leh ngei dawn tih chu rinhlelh rual loh a ni tih a sawi a ni. 
	Lunglei Municipal Council inthlan turah, rorel lai party an nih angin, theihtawp chhuaha an beihna azarah LMC hringtu leh dintu MNF chu Pathian leh mipuiin sawrkarna an pek ngei a beisei tih a sawi bawk.