AR ram luaha ram neitu court-a kalte ngen dawn

Lammual chhehvela Assam Rifles luah chhunga mimal ram neitu thenkhat, court-a kalte chu an thubuai hnukkir tura ngen rel a ni.Chief minister Lalduhoma kaihhruaiin Assam Rifles Ram Advisory Committee an a vawikhatna atan Thawhtanni khan thukhawm a. GAD commissioner Vanlaldina Fanai chuan AR ram chhuahsan taka hmalak chhoh dan a sawifiah a; depreciated cost of buildings-ah cheng vaibelchhe 5 vel pek a ngai dawn nia a lan thu a sawi.
Aizawl bawrhsap Er Lalhriatpuia pawhin tunhnaia Zokhawsang leh Lammual chhehvel joint verification an neih a report a ni.
Advisory Committee hian AR ram chhunga ram nei mimal, pawl leh kohhran chu an ram pass sawrkara hlan let vek tura ngen nise, a ti a. Ram neitu thenkhat court-a sawrkar khing mekte pawh an thubuai hnukkir tura ngen an rel. Sipai chhuahsan ram hi mimal, pawl, party, NGO leh kohhran kutah lut lo se, tiin lungrual takin thu an titlu a ni.
UD & PA department-in master plan an duan chhin an thlirhoa, a tul anga thlirho leh atan an dah.
Advisory Committee hi section 6 of the Mizoram (Restriction on use of Transferred Land) Act 2002 hnuaia din a ni a. Chief minister hi chairman niin, Home minister chu vice chairman a ni. Official member 16 bakah invitees – tlawmngai pawl leh environment humhalhtu pawl 14 an tel a ni.