Arambai Tenggol hruaitu man vangin lungawi lohna lantir

Arambai Tenggol hruaitu man vangin lungawi lohna lantir
Arambai Tenggol hruaitu man a nih avangin Manipur khawpui, Imphal-ah Inrinni zan khan lungawi lohna lantir a ni.
Lungawi lohna lantirtu, a tam ber thalaite hi Meitei volunteer pawl, Arambai Tenggol (AT) member-te niin Kuki-ten inepna boruak lian tak a chhuah lai khan an khua an bei nasa hle niin an sawi a. Khawlaiah lirthei ke an hal a, AT hruaitu, Kanan Singh-a man a ni chu an duh lohzia an aupui bawk.
Imphal-ah hian zankhuain mipui pungkhawmte hian Kanan Singh-a chhuah duhna hi an lantir a. Mi cheng thenkhat chuan Kwakeithel vengah chuan silai puak ri ni awm tak an hriat thu social media-ah an tar lang hlawm.
Lungawi lo thenkhat chuan Governor AK Bhalla-a thupek zawmin AT chuan dan lo leh an ruk ralthuamte thuneitute hnenah an hlan let vek tawh a, tunah chuan ralthuam engmah an nei tawh lo va, thuneituten himna an pek ve thung a ngai niin an sawi a. ‘Village volunteer’ inti, Meitei khua beitu Kuki helte man an phu bawk.
Imphal-a Meitei-ten lungawi lohna an lantir mek lai hian Kuki-te pawhin October, 2023-a ralsai silai hmanga police thah nia sawi thubuai kal zelah Moreh khuaa an hnam mi an man duh lohna an lantir ve bawk.
Kuki mipui pawlte chuan Kamginthang Gangte-a hi ‘engmah chiang lova man’ niin an sawi a, ani hi Manipur Police officer Chingtham Anand-a thattua puh ber a ni a. Man a nih duh loh lantir nan Moreh awmna, Tengnoupal district-ah chuan inkhar an kalpui.
National Investigation Agency (NIA) chuan Manipur-a thil thleng hrang hrang chhui hna an thawk mek zel a, heng zingah hian AT chief Korounganba Khuman-a laka thubuai pawh a tel.
Police chuan an state hi lian takin hnam hnihah an inthen a, khawi lam ve vea mi pawh man emaw, hren emaw tum pawhin nasa takin an intan thin niin an sawi.
Tar lan tawh thin angin Manipur-ah hian May, 2023 atanga Kuki leh Meitei inkarah buaina nasa tak chhuakin mi 200 velin an thih phah tawh a, mi sang tel mahni in chhuahsana baihvaiin an awm phah mek bawk.