Argentina, Brazil leh Italy te an tla

Hmeichhe World Cup khelh mekah August 2, Nilaini khan Group Stage khelh zawh a ni a. Mipa lamah football thiam ram Argentina, Brazil leh Italy te last 16 lut zo lovin an tla vek. Football ram ropui pathum an tlak rual thawih lai hian Germany chu group stage an paltlang hram thung.
Mipa lamah World Champion ni mek Argentina hmeichhia ten last 16 lut thei tura chak ngei ngei an mamawh laiin Sweden lakah si hnih faiin an tlawm a. Point khat chauh hmu chungin World Cup 2023 an thlahliam.
Argentina hian chak mamawh em em chungin Sweden hi Waikato Stadium, Hamilton, New Zealand-ah an hmachhawn. Goal thun ngei tumin an khingpuite an nawr a, darkar khat chuang zet chu an goal an venghim thei bawk. Chak ngei tumin tan khawh bawk mah se hun tawp dawn hnaih lamah goal hnih an chhuah ta thung. Sweden tan hian Rebecka Blomqvist chuan minute 66-naah hmahruaina goal a thun.
An si phurh sut an mamawh em em laiin Argentina an chesual a, penalty an chawi zui leh. Sweden penalty hmuh hi Elin Rubensson chuan minute 90-naah a pet goal a, an hmahruaina a ti zau. Chak mamawh viau mahse Argentina in an si phurh an sut thei lova, si hnih faiin an tlawm. Sweden lakah an tlawm vangin Argentina hi Group G-ah a mawngphah an ni a, point khat bak an hmu thei lo.
Group G atang hian Argentina an tlak rualin Italy an tla bawk. Italy hian last 16 lut tura point khat chiah mamawh chungin South Africa an hmachhawn a, mak tak maiin tlawm zawkah an tang teh tlat a, uiawm taka tlain, last 16 an lut zo lo.
Last 16 lut thei tura chak mamawh South Africa hian Italy lakah bul an tan chhe viau a, minute 11-na lekah goal an chhuah nghal. Last 16 lut tur draw tal mamawh Italy tan hian Arianna Caruso chuan minute 11-naah penalty atangin hmahruaina goal a thun a, last 16 an hnaih hman hle.
Hma takah goal thun mah se chawlhlawk hmain Italy an chesual a, an lamah an ti-goal. Minute 32-naah Benedetta Orsi’n an lamah a tih goal vangin South Africa in an si phurh an sut. Chawlhlawk hnu lamah South Africa an khel tha chhunzawm a, minute 67-naah Hildah Magaia chuan hma an hruai letna goal a thun a, chak theih beiseina sang zawk an nei.
Hnufual zawka an tan hnuin Italy in goal thun ngei tumin tan an khawh zui leh nghal zat a, minute 74-naah Arianna Caruso chuan goal thunin an si phurh a sut. Hun pangngai tawp thlengin 2-2 in an inhnehtawk a, Italy hian last 16 an hnaih hle tawh. Tla ngei tura ngaih an nih hman laiin South Africa in thil mak an thlentir a, hun pek belh minute 90+2-ah Thembi Kgatlana chuan goal pawimawh zet mai a thun a, hma an hruai nawn leh. He goal hi hun tawp thlengin an venghim a, Italy hi 3-2 a hnehnin last 16 lut zawkah an tang zui ta daih a ni.
Nilainia inkhel dangah chak mamawh Brazil chuan Jamaica an hmachhawn a, an mamawh point hlawhchhuak zo lovin an tla. Jamaica hian last 16 lut turin Brazil laka tlawm an pumpelh a ngai a, Brazil an inhnehtawkpui thei a nih chuan last 16 an lut dawn. Brazil tan erawh last 16 lut thei turin Jamaica hneh ngei ngei a ngai thung. Inkhel pawimawh takah Jamaica hian an mamawh point khat an hmu a, Brazil an tlak laiin last 16 an lut ta bik a ni.