June 15, Ningani zan khan World Champion Argentina chuan friendly match khelin, Workers’ Stadium, Beijing-ah Australia an hmachhawn. Argentina hian World Cup 2022 a an hneh zat ang chiahin Australia an hneh nawn leh. He inkhelah hian Lionel Messi chuan inkhel tan atanga minute khat second 19-na lekah goal a thun a, hei hi goal a thun tawh zawng zawng a thun hma ber record a ni.
Argentina hian World Champion an nih hnuah ram danga an inkhelh hmasakna berah tha zetin bul an tan a. An khingpui Australia lakah hian inkhel tan atanga second 19-na lekah Lionel Messi chuan hmahruaina goal a thun nghal. Messi hian Fernández hnen atanga ball a dawn chu box pawnah a khalh rem hnuin mawi zetin a pet goal a, hmahruaina goal a thun. A vawi riat nana Ballon d’Or dawng thei tura ngaih Messi hian Argentina tan goal 103 a thun tling ta chiah a. He tiang zat goal a thun tawh. Club leh ram tan goal 700 chuang zet a thun tling tawh bawk. Hetiang zat goal zingah hian ninga zanah Australia laka goal a thun kha goal a thun hma ber tum a ni. Messi hian Argentina tan a khelh hnuhnun vawi 10-ah goal 12 zet a thun a, a chetha tluang hle.
Footballer ropui bera ngaih Mesi hian club tan a vanglai a hman laiin ram tan beisei a phak lova, Argentina a champion pui hleithei lo. A chuai ve tan tawh lamah ram tan a ropui thar a, inelna lianah a champion zawnpui ta hial. Hei hian footballer ropui ber a nihna a nem nghet. Messi hian European club leh Saudi Club sawmna hnarin Inter Miami a pan a, USA lamah chona thar a hmachhawn dawn.
Hma taka goal an thun hnuin Argentina hian inkhel thunun zui viau mah se, goal dang an thun belh har hle thung. Minute 68-naah Germán Pezzella chuan De Paul siamsak atangin an goal hnihna a thun a, goal dang a luh belh tawh lo.
Argentina in Australia an hneh
Get real time updates directly on you device, subscribe now.
Prev Post
Next Post