Arm wrestling international gold awrhtu Mizo tlangvalte

June ni 16-18, 2023 chhunga Pragati Maidan, New Delhi-a India rama Fitness Expo lian ber leh ropui ber IHFF Sheru Classic zawh fel takah Mizo arm wresler-te an chetha a, champion zawng zawngte inel lehnaa chak ber zawnnaah Mizo tlangval Denic Lalruattluanga chu pakhatna niin, Champion of the Champions (COC) a ni!
Khawvel huap pawha infiammi mi bik leh mi larte kalkhawmna Interna-tional Standard Sheru Classic-ah hian Mizo arm wresler mi panga chhuakte chuan gold medal pathum, bronze pakhat leh COC nihna an hlawh chhuak a, vawiinah Mizo team hian Delhi chhuahsanin Aizawl an lut ang.
He championship-ah hian Ben-jamin Lalawmpuia (Luangmual) chuan kg 100 chung lam inelna huangah gold medal a hlawhchhuak a; Mizoram Arm Wrestling Asso-ciation (MAWA) general secretary ni lai Philip Lalbiakchama Hrahsel (Kanan) chuan kg 100 huangah bronze medal a awrh ve bawk.
Tarlan tawh angin, Denic Lal-ruattluanga (ITI & Neihdawn) chuan kg 90 huangah gold medal elhchhuakin, Champion of the Champions a ni.
Mizo ban elh chak dang VL Zothansanga (Khatla) chuan kg 80 huangah gold medal hlawhchhuak bawkin, Lalrampana (Kolasib) pawh kg 60 huangah inlanin, ani hian vanduai-thlak takin medal a awrh zo ve ta lo.
He championship hi international standard niin, infiammi kalkhawmte pawh khawvel huapa a tha ber berte an ni a, chuvangin, he championship-a champion hi thil harsa leh khirh tak pawh a ni reng a ni.
He mia tel chin hi chu khawvel huapah pawh an nep thei lo hrim hrim a, champion zawng zawngte inel lehnaa chak ber zawnnaah Mizo tlangval Denic Lalruattluanga COC a ni thei hi a ropuiin, khawvel huapah pawh Mizote arm wrestling-a kan duai lohzia a chiang hle a ni.
India ram bikah Mizote hian arm wrestling-ah ro kan rel mek mai ni loin kan awp hneh hle a; India Arm Wrestling Fedaration (IAF) COC, India Open COC, IAF Junior COC leh All India Police COC-te kan kawl mek a, he’ng bakah hian mahni weight category huanga champion lai kan kawl teuh bawk a ni.
National level, a bikin senior level chinah chuan eng game-ah pawh champion hi a harsa em em a, chutih laiin Mizo arm wrestler-te vawi tam tak national senior level-a an champion reng thei hi a ropui hle a ni.
MAWA chuan an hnuaia Mizo arm wrestler-te hlawhtlinna an lawmpui rualin an kal leh zelna turah duhsakna sang ber an hlan tih thu-chhuah siamin an tarlang.