Spain an champion

Pathianni zan khan UEFA Nations League final khelh a ni a, inkhel hmuhnawm takah Spain chuan penalty shootout-ah Croatia an hneh a, an champion.
De Kuip, Rotterdam-a final-ah Spain leh Croatia te an inhnehtak viau a, minute 120 chhungin goal thun thei an awm lo. Spain in ball chang tamin, hlauhawm an siam tam zawk naa goal an thun thei bik lo. Hun pangngai leh extratime-ah goal thun thei an awm loh vangin penalty shootout hmangin champion tur zawn chhunzawm a ni.
Penalty-ah hian Spain si nghak Unai Simon chuan Lovro Majer pet a dansak a, chak theihna hun tha an nei. Chak theihna hun tha an neih laiin Emeric Laporte chuan goal kham a pet per a, chakna hun tha an neih hmasak an chhawr tangkai thei lo. Laporte-a’n a thelh hnu hian Croatia tana Bruno Petkovic pet chu Simon-a’n a dansak zui leh. Champion theihna hun tha an neih nawn leh hnuin player tawnhriat ngah Dani Carvajal chu Spain tan penchhuak a. Real Madrid defender Dani Carvajal hian chiai hauh lovin a pet goal a, Spain chu Nations League champion thar an ni.
Croatia hnehtu Spain hi kum 11 zet hnua an champion lehna hmasa ber a ni a. France hnung zuiin World Cup, European Championship leh Nations League-a champion kawp thei pahnihna an ni.
Nations League final khelh hmasa hian Netherlands leh Italy ten pathumna an inchuh a. European champion Italy chuan 3-2 a inelna thlengtu Netherlands an hneh a, pathumna an ni