Arsenal an chak zel, Tottenham an tla

Thawhleh zan khan English Carabao Cup third round khelh chhunzawm a ni a, inelna hrang hrangah Arsenal an chak zel laiin an hmelma lian Tottenham Hotspurs erawh an talbuai zui zel a, third round paltlang zo lovin an tla. Arsenal in 4-2 a Ipswich Town an hneh laiin Tottenham chu Liverpool hneh lovin an tla ve thung.
Dowman a vul
EPL champion Arsenal hian Mimualah EPL club tho Ipswich Town an hmachhawn. Mikhual an nihna hmunah khingpui hautak nei bawk mah se an team B ten phu takin hnehna an chang ta tho. Mimuala an chak tum hian Gunners tan rawlthar duhawm Max Dowman a vul a, goal hnih a thun. Goal hnih a thun leh tak vangin Dowman hian kum 16 mi Dowman hian hmabak a neih enzia a lantir nawn leh.
Arsenal hian mikhual an nihna Portman Road-ah bul an tan tha viau a, inkhel tan atanga minute -na lekah rawlthar duhawm Max Dowman chuan Eze siamsak atangin hmahruaina goal a thun nghal. Hma takah goal an thun vangin an phur a, goal dang pawh an thun belh leh thuai. Bukayo Saka a nekchhuah zawh rih loh vanga khelhna hmun chang tam thei lo Noni Madueke chuan minute 16-na lekah an goal hnihna a thun. Inhnaihchilh taka goal hnih an thun hmangin Gunners hian 2-0 a hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal dang an thun belh leh thuai. Goal hmahruai thuntu Max Dowman chuan second half tan atanga minute hnihna lekah an goal thumna a thun a, an hmahruaina a tizau leh zual. Dowman goal thun hnuin Arsenal khelh that a kaltluang a, minute 58-na lekah Mikel Merino chuan an goal lina a thun belh zui leh cheu a, mikhual an nihna hmunah 4-0 ngawtin hma an hruai.
An mualah ngei 4-0 ngawta a hnufual hnuin Ipswich Town lamin an thangtlawm lutuk tur tihziawm tumin tan an khawh zui chiam a, goal hnih an thun zui ta hial bawk. Mualneitu team tan hian Anis Mehmeti chuan minute 62-naah goal thuin an si phurh a sut then. Goal lut a awm belh theih loh vang vang hnuin Chuba Akpom chuan minute 90’+1-ah an goal hnihna a thun zui leh a, an inkar an tizim leh zual. An goal hnihna thun bawk mah se goal dang an thun belh thei tawh lova, season thara khel tha tluang tak Arsenal ngam lovin an tlawm zui ta a ni.
Tottenham an tla
Third round a inkhel dangah team lian pahnih: Liverpool leh Tottenham te an intum nghal a. Anfield-a inkhel hmuhnawm takah mualneitu team Reds an chungnung zawk a, 3-1 a hnehna changin fourth round an inhlangkai.
Liverpool hian Anfield-a an mikhual Tottenham lakah bul an tan tha a, Alexis Mac Allister chuan minute 21-naah hmahruaina goal a thun. Hma takah goal thun bawk mah se goal dang thun turin an nghah rei a ngai thung a, chawlhlawk hmain goal a luh belh thei lo.
Chawlhlawk hnu lamah Liverpool an langsar hmasa leh a, minute 54-na lekah Cody Gakpo chuan an goal hnihna thunin an hmahruaina a tizau. Si hnih ngawt an phurh hnuin Tottenham tan Conor Gallagher chuan minute 69-naah goal thunin an si phurh a sut then. Goal an thun vangin phur bawk mah se Liverpool tan Dominik Szoboszlai chuan minute 90’+1-ah an goal thumna a thun zui leh a, Tottenham beiseina a tihtawksak.