Arsenal daltu lian Chelsea

November 30, Pathianni zan khan English Premier League-ah inkhelh ngaihven hlawh tak a awm a. London derby hmuhnawm takah tlem zawk ni chungin Chelsea in Arsenal lakah tlawm an pumpelh. Arsenal lakah tlem zawk ni chunga tlawm pumpelh hi result tha tak a ni a, Arsenal kawng daltu lian Chelsea hi fak loh theih loh ana ni.
Inkhel hmuhnawm chu
Chelsea leh Arsenal te inkhel tur hian ngaihven a hlawh a, an inkhelh tan hma hauh atangin boruak a lian nghal hle. Stadium chhung, khelmual pannaah Chelsea in an trophy lak thenkhat an pho lang a. Hengte hi Arsenal in an la lak ve loh, Champions League, UEFA Super Cup leh Fifa Club World Cup te niin an sawi a. An trophy an chhuan hrim hrim lam ai mahin an elpui lian Arsenal an tihelna a ni a, an chhiahna a ni tel bawk. Hei bakah hian Arsenal in na tak taka ball an vawm theih loh nan an advertisement wall pawh an hung hnai niin sawi a awm cheu bawk. London club lian pahnihte hi an incho tawk em em a, Chelsea hian an mualah tlawm an tum lo bur a ni ber mai.
Inkhel hma boruak ringawt pawh a ngaihnawm tawh a, mualchhunga inkhel pawh a hmuhnawm zui hle. Inkhel tan phat atangin an indim lo nghal hle a, inkhel tirte atangin card an hmu nghal mawlh mawlh. Defender pawimawh pahnih; William Saliba leh Gabriel te an chhawr theih loh ve ve vangin Arsenal tlarhnungin ngai an awh lova, an talbuai zauh zauh. Chak tumruh em em Chelsea an khel tha a, an ngam bawk a Arsenal an chhaihbuai a, an duh angin an khelhtir thei lo.
Game hmuhnawm leh tang takah team hnihte tlarhnung a phui tha viau a, goal thun theihna hun tha an inpe duh meuh lo. Rawlthar duhawm Estavo hnawksak viau mah se ho takin a hun tha neih a hlah thung a, a tawp a khar tha thei bik lo. Inkhel hmuhnawm takah hian Chelsea midfielder pawimawh Moisés Caicedo chuan chiang takin Arsenal midfielder Mikel Merino a tlawh a, VAR rawn a nih hnuin Caicedo hi hnawhchhuah a ni.
Tam zawk an nih vangin Arsenal tantute an phur a, point thum hmuh theihna hun remchang tha tak neiah an inngai. Mah se chu chu mualchhunga Chelsea player te ngaihdan a ni ve lo. Gunners tan hian Grabiel Marinelli chuan hun tha nei bawk mah se si nghak Sanchez a paltlang zo lova, Cheslea an him. Huaisen taka inlan Chelsea hi goal thun hmasa zawkah an tang ta nge nge. Second half tir lama corner an hmuh chu an chhawr tangkai a, defender Trevoh Chalobah chuan minute 48-na lekah mawi taka tauh goal in hmahruaina goal a thun.
Tam zawk ni chunga goal an chhuah vangin Arsenal manager Mikel Arteta chuan Eze leh Martineli lachhuakin Madueke leh Captain Martin Odegaard a luhtir a, Arsenal game a nung zui nghal. Arsenal hian hun tha nei zui nghalin Bakuyo Saka siamsak tha tak chu Mikel Merino chuan minute 59-naah chiang zetin a tauh goal a, an si phurh a sut. Arsenal in goal an thun chiah hian chak tur zawk a rin thiam theih nghal ruak a, tam zawk Gunners hi chak tura rin an ni.
Tlem zawk ni chungin goal chhuah bawk mah se Chelsea in team tha an nihzia a lantir a, tam zawk chunga inlan Arsenal nen an zim tawk chung chung a, chugnung zawk awm thei lo khawpin an inhnehtawk. Blues hian na takin an khingpuite nawr thei lo mah se counter attack-ah an hlauhawm viau zel thung a. Chak tum viau mah se Arsenal game in awmzia a nei thei tak tak chuang lo va, goal chhuah belh tum lova tan khawh Chelsea tlarhnung su tlang tur khawpin theihna an lanchhuahtir thei lo. Tam zawk an nih vanga chak theihna hun tha an neih chu a lo thlawnin an khawhral a, Stamford Bridge-ah tlawm pumpelh bawk mah se uiawm takin point hnih an hloh thung.
Chelsea laka chak zo lo Arsenal hian khelh 13 atanga point 30 hmuin table chung ber an luah chhunzawm a, point 5 in hma an hruai fal mek. An mualah tlawm pumpelh mah se Chelsea hi pathumnaah an tlahniam thung.