Stray Kids-in No.1 a\angin Taylor Swift an nawr sawn ta

On Dec 2, 2025 9 0

Stray Kids-in No.1 atangin Taylor Swift an nawr sawn ta
K-Pop group Stray Kids chuan Billboard 200 (US albums) chart-ah kar sarih chhung No.1 ni tawh, Taylor Swift rawn nawr sawnin, an album thar ‘DO IT’ chu No.1-ah an debut pui a, he chart-a No.1 album pariat an neihna a ni. Hetihrual hian Wicked: For Good, Tate McRae, Hazbin Hotel: Season Two leh Aerosmith & YUNGBLUD te pawh top 10-ah a lang.
Stray Kids hian album pariat an tichhuak tawh a, an album zawng zawng hi Billboard 200 chart No.1-a a debut vek a, a hmasa ber chu 2022-a an album ‘ODDINARY’ kha niin, hemi kum vek September thlaah ‘KARMA’ an No.1 pui leh a, tihian kum li chhungin No.1 album pariat an nei tling ta a ni. Stray Kids hian record siamin, Billboard 200 chart history-ah album an tihchhuah hmasak ber atanga No.1 ni nghal a, a zawna album pariat No.1-a debut pui vek thei hmasa ber an ni. Billboard 200 chart hi March 1956 atang khan kar tin tihchhuah thin a ni. Hei bakah hian Stray Kids hi tun kum zabi (2000) a group zinga No.1 album ngah ber an ni ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Stray Kids ‘DO IT’ hi kar khat chhungin 2,95,000 an hralh a, chung zinga 2,86,000 chu album tak tak hralhna niin, streaming atangin 9,000 (on-demand official stream maktaduai 13.98) a tling a, album-a hla a mala hralhna erawh chhiar tham a ni lo.
‘DO IT’ album-a hlate hi Korean deuh vek a ni a, Billboard 200 chart-a sap hla ni lo album No.1 ni thei 30-na a ni a, kuminah a pathumna a ni. Sap hla ni album he chart-a No.1 ni thei 30 zinga 20 chu Korean album a ni a, Spanish album paruk, Italian album pakat, French album pakhat leh Spanish, Italian leh French inpawlh album pahnih a ni.
The Wicked: For Good film soundtrack, Cynthia Enrivo leh Ariana Grande ten aw an thawhna chu 1,22,000 hralhin No.2-ah a debut a, 85,000 chu album tak tak hralhna niin, streaming atangin 36,000 (on-demand official stream maktaduai 47.27) niin, hla mal hralhna atangin 1,000 a tling thei bawk.
He chart-a a zawna kar sarih No.1 tawh, Taylor Swift ‘The Life of a Showgirl’ chu 86,000 hralh lein No.1 atangin No.2-ah a tawlh a, chart No.1 hlui pahnihin Swift hi dawtin, Morgan Wallen “I’m the Problem” chu 75,000 hralh lehin No.3 atangin No.4-ah a tawlh a, KPop Demon Hunters soundtrack chu 67,000 hralh lehin No.5-ah bawk a la awm.
Chart No.1 lo ni tawh Tate McRae ‘So Close to What’ chu 64,000 hralh lehin No.21 atangin No.6-ah a invawr thar leh a, he album hi hla thar dah lehin, a deluxe version an tlangzarh thar a, hei hian album hralh a tikal thar leh ta a ni.
Olivia Dean ‘The Art of Loving’ chu 49,000 hralh lehin No.7-ah bawk a la awm.
Hazbin Hotel: Season Two soundtrack chu 46,000 hralh lehin No.70 atangin No.8-ah a invawrh a, Aerosmith leh YUNGBLUD album thar ‘One More Time’ chu 39,000 hralh lehin No.9-ah a debut a, YUNGBLUD tan he chart top 10-a a lan vawi khatna niin, Aerosmith tan pawh 2012 hnua he chart top 10-a an lan lehna hmasa ber a ni a, a 2012 hmalam nen chuan an top 10 album 10-na a ni ve thung.
Chart top 10 khartu chu Summer Walker ‘Finally Over It’ niin, 37,000 an hralh leh a, No.2 atangin No.10-ah a tawlh ta a ni.