Arsenal hmahruaina a pan zel

April 16, Pathianni zana English Premier League khelhah hmahruaitu Arsenal chu West Ham United nen si hnih ve ve inpein an inhnehtawk a, Arsenal in champion an beiseina a chuai zual deuh deuh. Pathianni zana inkhel dangah Manchester United chuan si hnih faiin Nottingham Forrest an hneh a, pathumna an luah nghet.
Aw…a har an ti mang e!
Premier League-ah hun rei tak champion tawh lo Arsenal in champion tumin tan an khawh a. Season tharah bul tang thain, chetha tluang viau mah se champion tuma inumna boruak a len vanglai takin chak an harsat thar a. Si hnih faia hma an hruaina a zawnin an humhim thei lo zawn a, champion turin fiahna hautak zawk an hmachhawn a ngaih phah dawn. Mikel Arteta hnuaia hmasawn Arsenal hi an champion ve tawh dawn nge, a teuha tham ralin, Next season bawk an thlir leh rih zawk dawn.
London derby-ah Arsenal hian bul an tan tha viau a, minute 10 chhung lekin goal an thun hman. Goal hnih an thun hnuin penalty an hlawhchhuak cheu a, chak theihna hun tha tak nei bawk mah se chak an harsat a, point hnih an hloh leh ta tlat thung.
Gunners tan hian minute 7-na lekah Ben White siam tha zet mai chu Gabriel Jesus chuan awlsam takin a pet goal a, hmahruaina goal a thun. Hma taka goal an thun vangin Arsenal an khel tha chhunzawm a, goal pawh an thun belh leh thuai. Minute 10-naah Gabriel Martinelli ball vawrhluh tha tak chu Captain Martin Ødegaard chuan chiang zetin a hlap goal a, an goal hnihna a thun. Minute 10 chhung leka goal hnih an thun hman bakah game an thunun hneh em vangin Arsenal hi table hnuai lama awm West Ham lakah chak ngei tura ngaih an ni.
An mualah hma taka goal hnih chhuah in, ball chang tlem zawk fe mah se David Moyes-a team West Ham an hnual lova, huaisen takin an mikhualte an bei let. Minute 32-naah Thomas Partey tihsual vangin an khingpuite an nawr tlang a. Box chhungah fuh taka ball an inpek hnuin Arsenal defender Gabriel chuan penalty a chawi. He penalty hi Saïd Benrahma chuan awlsam takin a pet goal a, an si phurh a sut then.
Chawlhlawk hnu lamah Arsenal an khel tha chhunzawm zel a, goal thun belh theihna hun tha an nei leh thuai. Gunners hian hand ball vangin penalty an hmu a. He penalty hi rawlthar player tangkai Bajuyo Saka chuan petin goal pawnah a pet chhuak teh tlat a, an hmahruaina an tihzau theih loh phah.
Arsenal in penalty an hlah vangin West Ham an phur thar a, goal thun belhin an si phurh an sut zo ta nge nge. Minute 54-naah Jarrod Bowen chuan nalh zetin a pet goal a, an si phurh a sut zo ta nge nge.
An hmahruaina zawng zawng an hloh vai vek hnuin Arsenal hian chak tumin thapui an thawh zui chiam a. Inkhel thunun viau mah se a pawimawh ber goal an thun thei lova, West Ham nen 2-2 in an inhnehtawk ta nge nge. Hammers nen an inhnehtawk tumin Arenal hian 72% zet ball chang chungin hnehna an chang zo chuang lo.
Champion tuma tan khawh Arsenal hian Liverpool lakah si hnih faia hma an hruaina an hum zawh loh hnuin West Ham lakah si hnih faia hma an hruaina an hum zo lo leh bawk a. Hei vang hian champion turin an kawng a harsat phah leh zual ta viau. Khelh 32 atanga point 74 hmuin, point liin hma an la hruai naa an hnuai chiaha awm Manchester City aiin game khatin an khel tam zawk thung. Hei bakah hian an muala an ngam loh City hi Etihad Stadium-ah an hmachhawn a ngai dawn bawk a. Arsenal hi champion turin rin ngam an har ta hle.
Pathumnaah United
Pathianni zana inkhel dangah Manchester United chuan 19-naa awm mek Nottingham Forrest an hmachhawn a. Pathumna luah nghet turin Erik ten Hag-a team te hian si hnih faiin hnehna an chang.
City Ground a lenglut United hian an khel tha thawkhat viau naa goal an thun lawk thei lo. Darkar chanve an khelh chuan hnuin minute 34-naah Antony chuan hnaite atanga pet goal in hmahruaina goal a thun. United in hmahruaina goal an thun theih nan Anthony Martial a thawhhlawk hle, Martial pet hlauhawm tak chu Nottingham si nghak Keylor Navas-a’n a lo dang a. Ball ber let leh hi Antony hian awlsam takin goal-ah a lo chantir.
Chawlhlawk hnu lamah United an khel tha chhunzawm a, first half an g thoin goal an thun thei lawk chuang lo. Hun tha an hlah zawn hnuin minute 78-naah Antony ball pek fing tak chu Diogo Dalot chuan harsatna tawk lovin a pet goal a, an chakna a nem nghet a. Pathumna luah nghet turin point thum an hlawhchhuak zui ta a ni.