Arsenal in champion zia an chhuah

Pathianni zan khan English Premier League (EPL) 2025-26 khelh chhunzawm a ni a, inkhel ngaihven hlawh tak; North London derby-ah Arsenal chuan an hmelma lian Tottenham Hotspurs lakah phu takin hnehna an chang. Tottenham lakah tha zeta inlan Gunners hian champion zia an chhuah a, champion an chak tak zet tih mualchhungah an tilang.
Inrinni zanah Manchester City an chak vangin Arsenal hian point hnih chauhin hma an hruai tawh a, City aia an khelh tam zawk dawn bawk si vangin an hmahruaina a derthawng tawh hle. Chak an mamawh laia an khingpuite hi North London-a an elpui lian, chungnung zawk inchuh reng renga hmanhlel a, inhal em em reng an ni a. Mimuala inlan tur an nih bawk si vangin an mahni tantute an hlauthawng a, an rilru a hah lawk hle. Wolves laka chak zo lo an ni tlat a, pressure na takin a delh bawk nen Arsenal tantute tan ngaihngam taka awm a har hle. Hlauthawng thaw dep depin awm bawk mah se an player ten champion zia chhuahin an khel tha ta em em thung a, North London derby-ah inchhuang larh chungin hnehna an chang a, point thum hlu tak an hmu.
Tottenham muala lenglut Arsenal in bul an tan tha viau a, ngam takin an khingpuite an nawr nghal. Inkhel tantirh lamah Viktor Gyokeres chuan hlauhawm takin a tauh a, Gyokeres hian shot hlauhawm zet mai a nei zui leh bawk. Inkhel hmuhnawm takah goal lut a awm theih loh reng hnuin Arsenal in goal an thun ta nge nge. Bukayo Saka chuan fuh zetin a khalh tlang am tha taka a siam chu Eberechi Eze chuan fuh zetin a hlap lut a, minute 32-naah hmahruaina goal a thun. Eze goal thun hian Arsenal a fuih phur zui hle.
Hmahruaina goal an thun vangin phur viau mah se Arsenal an phur rei lo viau a, an chesual zui zat thung. An goal bul hnaihah chep tak karah ball an inpekual a, season kal meka an player tha ber Declan Rice a chesual a, Kolo Muani lakah ball a hloh. Muani hian fuh zetin a khalh tlang a, lei hrulah kawh zeta pet goal in minute 34-naah an si phurh a sut. Inhnaih chilh taka goal a lut zawn hian inkhel a tihmuhnawm zual a, derby boruak tang sa tak pawh a tang leh zual sauh bawk. Team hnihte hian goal thun tumin tan khawh nasa viau mah se chawlhlawk hmain goal dang a luh belh thei tawh lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm zui viau a, khel tha leh zual Arsenal chan a ni deuh chawt ta thung. Gunners hian second half ah bul an tan tha viau a. Second half tan atanga minute hnihna lekah Viktor Gyokeres chuan fuh zetin a pet kual lut a, box pawn atanga goal tha tak thunin minute 47-naah hma an hruai nawn lehna goal a thun.
An mualah an hnufual nawn leh hnuin Tottenham in an si phurh sut ngei tumin thapui an thawh zui leh nghal a, goal pawh an thun leh thuai. Kolo Muani chuan si nghak David Raya dan rual lohin pet goal bawk mah se Muani hi defender Gabriel Mangalheas lakah a lo fault zeuh vangin a goal thun pawmsak a ni lova, Arsenal an him. Muani goal thun hi pawm ni ngat se inkhel result a danglam dawrh thei hialin a rinawm.
An him hlauh hnuin Arsenal an khel tha zui viau a, an khingpuite an nawr buai fo. Fuh taka an khingpuite an nawr tlang hnuin Bukayo Saka chuan goal thun theihna hun tha a hlah. Saka hian pet goal nghal lo mah se Eze tan vanneihna a ni hlauh thung. Goal hmahruai thuntu Eze hian minute 61-naah an goal hnihna a thun a, an hmahruaina a tizau.
Eze hian Tottenham lakah goal a thun thei hle. Arsenal tan Tottenham a hmachhawn hmasak berah hattrick a siam nghal a. Spurs a hmachhawn vawi hnihnaah goal hnih a thun leh bawk a, season kal meka North London derby-ah a hero hle. Manager Mikel Arteta-a’n lachhuak lo se Eze hian hattrick a siam leh mai a rinawm viau.
Si hniha an hnufual hnuin Tottenham manager lailawk Igor Tudor chuan goal thun tumin tan a khawh a, an forward pahnih; Solanke leh Richarlison te a luhtir. Brazil forward Richarlison hian goal a thun teuh viau a, a ball khen fing leh fuh zet chu si nghak David Raya chuan goal line atangin a bengchhuak thei hram a, an team a chhanhim nawn leh.
Si hniha hmahruai tawh Arsenal hian goal thun belh ngei tumin tan an khawh a, Wolves laka an chetsual ang mai maiin chetsual an tum tawh lo. An khingpuite an zim tawt zung zung a, hun tawp hamrik a rik thlengin tan an khawh tluanchhuak zak. Inthlahdah hauh lova tang mar reng Arsenal hi hun pek belhah an che fuh leh ta nge nge a. Viktor Gyokeres chuan fuh taka ball a khalh tlang hnuin chiang zetin a pet goal a, minute 90+4-ah an goal lina a thun a, an chakna a nemnghet. Gyokeres goal thun hnu hian goal dang a luh belh thei tawh lova, Arsenal chuan an hmelma lian ber Tottenham lakah 4-1 ngawtin hnehna an chang a, point thum hlu tak an hmu.
Tottenham hnehtu Arsenal hian khelh 28 atanga point 61 hmuin table-ah point 5 in hma an hruai fal chhunzawm. An hnuaia chiaha awm Manchester City aiin vawi khatin an khel tam zawk thung. Gunners hian Pathianni zanah London derby an hmachhawn zui leh nghal dawn a, Emirates Stadium-ah Chelsea an mikhual ang. Table-ah 16-na luah mektu Tottenham hian Fulham an hmachhawn zui ve leh ang.