Arsenal in Liverpool an hnaih thei lo

Inrinni zan khan English Premier League khelh chhunzawm a ni a, an muala tlawm Arsenal chuan Liverpool an hnaih thei lo. An mualah Arsenal an tlawm laiin Manchester United chuan Everton lakah tlawm an pumpelh ve hram bawk.
Arsenal tan a mak a na!
Kar laihawlah hmahruaitu Liverpool an chak zawh loh vangin Arsenal in Reds nen an inkar tihzim theihna hun remchang an nei a. An mikhual West Ham United an hneh a nih chuan Liverpool an phak lohna chu point nga chauh a ni tawh dawn a, champion beiseina sang zawk an nei thei dawn. Chak an mamawhna inkhela tlawm khut thin Arsenal kha Arsenal an la ni reng a, hun pawimawh takah an tlawm leh khut a, Liverpool nen an inkarah point riat a tlazep chhunzawm a. Liverpool hian City an hneh a nih chuan point 11 zeta hmahruai falin, champion tuma inumna a tawp zui titih thei hial dawn.
Chak mamawh Arsenal hian an mualah bul an tan tha a, an mikhualte an nawr bet. Ball chang tam zawk ni mah se Gunners hian goal an thun thei lo thung. Chawlhlawk dawn hnaiah Hammers hian fuh takin mualneitu Arsenal an nawr let. Manchester United defender hlui Aron Wan-Bissaka chuan Arsenal defender Ricardo Calafiori a bum kual hrep hnuin fuh zetin a siam lut a. Arsenal player thum kara dawkchhuak nawlh Jarrod Bowen chuan fuh zetin a tauh goal a, minute 44-naah hmahruaina goal a thun.
Chawlhlawk hnu lamah an si phurh sut tumin tan an khawh chiam a, hlawhtlinna erawh an chang thei chuang lo. An mikhualte an nawr luatah an chesual nawn leh. West Ham hian hlauhawm zetin an nawr let thut a, Arsenal rawlthar player Myles Lewis-Skelly hnawhchhuah a nih phah. Si phur zawk ni chunga kim lo zawk an nih leh zel vangin Arsenal hian inkhel pawimawh takah goal an thun thei lo tluang a, an mualah ngei mak tak maiin an tlawm zui ta a ni.
Season hnih liam ta leh season kal mekah Arsenal hi an khel tha viau thin a, an khelh that laiin hun pawimawha chetsual khut an ching viau thung. An elpui lian lakah hmahruai fal theihna hun remchang an neih angah te, an chunga awmte nihrual theihna hun tha an neih angahte leh an chunga awmte nen an inkar tihzim theihna hunremchang an neih tumte in tlawm khut emaw, chak zawh loh tut emaw an ching a, chu chu an champion loh phah thin. He an buaina hi an sukiang thei lo tluang zel a. Inkhel pawimawh takah West Ham laka an tlawm leh khut vangin Arsenal tan champion beisei huai ngam a har ta hle.
United an chak zo lo
Season kal mekah United nena inhmeh tak chu chak loh leh chak zawh loh a ni. 15-naa awm mek United hi Everton hmachhawn turin Goodison Park-ah an lenglut. Mikhual an nihna hmunah si hnih an phurh zet hnuin goal hnih an thun a, tlawm an pumpelh thei hram.
United chung chiaha mi Everton tan hian chawlhlawk hmain Beto leh Abdoulaye Doucouré ten goal an thun a, hun rei tak chhung chu si hnih faiin hma an hruai. Hnufual zawkah an tan reng hnuin United tan hian Bruno Fernandes chuan minute 72-naah goal thunin an si phurh a sut then a. Manuel Ugarte chuan minute 80-naah goal thunin an si phurh a sut zo. Hun tawp thlengin goal dang a luh belh thei lova, Everton lakah United in tlawm an pumpelh hram a, point khat hlu tak an hmu.
Inrinni zana inkhel dangah Aston Villa chuan an mikhual Chelsea chu 2-1 in an lehthal. Chelsea tan hian captain Enzo Fernández chuan minute 9-na lekah hmahruaina goal a thun. An mikhual lakah si an phurh reng hnuin Aston Villa player thar Marco Asensio chuan chawlhlawk hnu lamah goal hnih a thun a, a team thar a chakpui. Villa tan Marco Asensio goal hnih thunte hi Manchester United atanga an hawh Mrcus Rashford siam ve ve a ni a. Chelsea lakah Villa player thar ten an khel tha hle.