February 2, Pathianni zan khan English Premier League-ah inkhel ngaihven hlawh tak a awm a, chu chu Emirates Stadium-a team lian Arsenal leh Manchester City te inkhel a ni. Pathianni zana inkhel ngaihven hlawh berah Arsenal chuan an mikhual Manchester City chu 5-1 ngwtin an sawp. An mualah 5-1 ngawtin chak mah se Arsenal an chapo lo, Stay Humble ehh! Pathianni zana inkhel dang; table laihawl hnuai lama mite inkhelah Crystal Palace chuan si hnih faiin Manchester United an hneh ve bawk.
Dawl zawrin City an zawr
Pahnihnaa awm mek Arsenal hia an mikhual Manchester City lakah an khel tha tak zet a, champion lai lakah hian goal 5 aia tam thun thei dinhmunah an ding. An elpui lian Arsenal lakah tlawm hreh viau mah se City hian an khingpuite an khan ngang si lova, hreh hle mah se dawl zawr takin an zawr lo thei ta lo a ni.
Inkhel ngaihven hlawh takah hian goal a lut hma hle a, inkhel tan atanga minute hnihna lekah City defender Manuel Akanji tihsual vagin Arsenal in hun tha an nei nghal. Kai Havertz siamsak tha tak chu captain Martin Odegaard chuan awlsam takin a pet goal a, hmahruaina goal a thun. Minute hnihna lekah goal an thun nghal vangin Mikel Arteta team an phur a, inrintawkna an nei sang zui viau bawk. Arsenal hian goal thun belh theihna hun remchang zet mai an nei zui leh a, Havertz chuan hnaite atangin a thelh tlat thung. City pawhin hlauhawm siam thin mah se EPL si nghak tha ber David Raya an paltlang zo lova, chawlhlawk hmain an si phurh an sut thei lo.
Chawlhlawk hnu lamah inkhel a hmuhnawm leh zual a, goal nga ngawt a luh belh. Minute 55-naah Erling Haaland chuan mawi takin a tauh goal a, City si phurh a sut. An si phurh an sut vangin City lawm viau mah se an lawm rei lo. An goal lawma a fan te authawm a reh fel hma hauhin goal an chhuah zui leh nghal. Goal an chhuah atanga second reilote-ah Laipui a puak zui leh nghal zat a, Thomas Partey chuan minute 56-naah Arsenal hmahruai nawn lehna goal a thun.
An hnufual nawn leh hnuin City tan thawhchhuahna hun tha a awm zui tawh lo. Aesenal hian mawi zet zetin goal thum an thun zawn a, si nghak Stefan Ortega tan thil hmuhnawm loh tak, a dan hman rual loh goal a ball thlawt lut hmuh tur pathum ngawt a awm zui. Gunners tan hian rawlthar duhawm Myles Lewis-Skelly chuan minute 62-naah mawi zetin a pet goal a, an goal thumna a thun.
Si hniha hma an hruai hnuin Gunners an inringtawk leh zual a, City an chiai ve thung. City an chiai lai hian Kai Havertz chuan minute 76-naah fuh zeta pet goal in an goal lina a thun a. 4-1 ngawta hmahruai tawh Arsenal tan hian EPL khel thei naupang ber Ethan Nwaneri chuan minute 90’+3-naah mawi takin an goal ngana a pet goal zui leh a. Arsenal hian in ngaitlawm, chapo lo takin an mikhual team lian City lakah 5-1 a hnehna changin, point thum hlu tak an hmu ta a ni.
City lakah an chak vangin Arsenal hian hmahruaitu Liverpool nen an inkar point thumin an tizim a, Reds nen an inkarah point ruk a la tlazep. Arsenal leh Liverpool te hi an la inhmachhawn dawn a, khelh hmasak a la awm nual bawk vangin champion tuma inumna borual a lian hle. Hetihlai hian hmahruaitu Liverpool leh Champion lai City te inkarah point 15 zet a tla zep tawh thung a. City hian Liverpool aia an khelh tam zawk bawk si vangin an tan champion a harsa hle tawh ngei dawn thung.
An mualah United an tlawm
Pathianni zana inkhel dangah Manchester United chu Old Trafford-a an mikhual Crystal Palace lakah 2-0 in an tlawm a. United hian Table laihawl hnuai lamah an luah nghet.
12-naa awm mek United hian Old Trafford-a an mikhual Crystal Palace lakah an khel chhe lem lo nain goal an thun thei tlat lo thung. Inkhel hmuhnawm leh inhnehtawk angreng takah hian goal lut a awm theih loh reng hnuin hun chawhnu lamah Palace in goal hnih an thun. Minute 64-naah Jean-Philippe Mateta chuan cross bar atanga ball per let leh chu awlsam takin a pet goal a, hmahruaina goal a thun.
Goal an chhuah hnuin United in an si phurh sut ngei tumin tan an khawh a. Hun tawp dawn hnaiah an chesual tlat thung. Mikhual team hian United tlarhnung tihsual vangin goal thun theihna hun tha tak an nei a. Goal hmahruai thuntu Mateta chuan minute 89-naah chiang zetin a pet goal a, an hmahruaina a tizauh belh. An mualah tlawm hreh hle mah se United hian hun tawp thlengin an si phurh an sut thei lova, an mualah ngei an tlawm zui ta a ni.
United laka point thum hlu tak an hmuh hmangin Crystal Palace hi 12-naah an kaisang a, an chunga awm United chu point khatin an lehpel. An mualah an tlawm vangin United hi 12-na atangin 13-naah an tlahniam ve thung a. Manager thar Ruben Amorim hnuaiah hma an la sawn tak tak thei lo.
Pathianni zana inkhel dangah 15-naa awm mek Tottenham Hotspurs chuan mikhual an nihna hmunah si hnih faiin mualneitu Brentford an hneh a. Pen khatin hma lam an pan ve hret bawk.
Arsenal in Manchester City an sawp
Get real time updates directly on you device, subscribe now.
Next Post