Mizoram hmeichhe hockey team chuan Uttarakhand-a National Games kal mek hmeichhe hockey inelnaah naktuk, Nilaini zing dar 8:45 hian an match hmasaberah Manipur an tum dawn.
Mizoram hi Manipur bakah a thlengtu Uttarakhand, Maharastra leh Jharkhand-te nen pool khatah an awmho a, Mizo nulate hmabak hi a awlsam dawn lo.
Kan hriat theuh angin, Hnahthial bul SOuth Lungleng nula H. Lalruatfeli tel thinnna leh tuna Kolasib nula Lalremsiami Hmar lansarhna Indian women’s hockey team hi khawvel huap pawha team tha niin, India leilungah a hmei-a-pain hockey league nung tak khelh mek a ni a, Mizo player, a bik takin hmeichhe lamin hockey-ah hian ke an pen nasa tulh tulh a, Siamite hnungzui tur naupang zawk pawh an rawn mawm chho mek a ni.
World number 9 ni thei khawpa India hmeichhe hockey team an invawrh mek avang hian tuntum National Games hockey tournament pawh hi a hniam thei dawn lo a, Mizo team dinhmun dik tak pholanna hun remchang a ni dawn.
India player rinrawl Lalremsiami erawh tuntum hian Mizoram tan a inlan thei dawn lo a, a club vawn lai tana league a khelh laklawh vang niin, Mizoram team-a a tel lo tur hi channa lian tak a ni ngei ang.
Mizoram Team
-- Advertisement --
1. KT Lalhlimpuii (Champhai)
2. C. Ramsangliani (Dungtlang)
3. Zothanmawii (Lungpho)
4. Elizabeth VL Lawmkimi (Keifang)
5. Vanlalrinhlui (Durtlang)
6. B. Lalrinpuii (Aizawl)
7. H. Lalruatfeli (South Lungleng)
8. Lalhlunmawii (Thenzawl)
9. Lalrindiki (Hnahthial)
10. Agnes Malsawmkimi (Serchhip)
11. Lalruatfeli (Tuipui ‘D’)
12. Marina Lalramnghaki (Kawnpui ‘S’)
13. Lalthantluangi (Kanghmun ‘S’)
14. Lalrinpuii (Hnahthial)
15. Lalbiaksiami (Lunglei)
16. Lalneihpuii (Denlung)
17. Ruthi Lallawmzuali (Siaha)
18. Z. Laldintluangi (Lunglei)
19. Lalpeksangi (Rotlang ‘W’)