Arsenal in point 7 in hma an hruai

March 4, Nilai zan khan English Premier League 2025-26 khelh chhunzawm a ni a, inkhel panga ngawt a awm. Hmahruaitu Arsenal chuan Brighton lakah hnehna pawimawh tak an chang a, champion hnaih lehzualin point 7 in hma an hruai fal tawh. Arsenal in hnehna an chan laiin pahnihnaah awm Manchester City chuan an mualah hnehna an chang zo lo ve thung a, Nottingham Forrest nen 2-2 in an inhnehtawk. City an chak zo lo hi Arsenal in hma an hruai fal theih chhan a ni.
Saka a inlar
An hmahruaina tizau thei tura chak mamawh Arsenal hian mikhual an nihna hmun American Express Stadium-ah bul an tan tha lova, goal an chhuah nghal teuh hle. Brighton in goal an thun ta emaw tih hnuah defender Mangalheas chuan tauhchhuakin a dang thei hram a, hma takah an team a chhan him. Hma takah goal an chhuah tep hian Arsenal a titang thar a, goal thun ngei tumin an khingpuite an nawr zui nghal. Fuh taka an khingpuite an nawr hnuin Bukayo Saka chuan minute 9-na lekah tha ang reng tak, vanneithlak tak siin a pet goal a, hmahruaina goal a thun. Saka pet kawh tak hi Brighton defender in a dang pial a, si nghak Bart Verbruggen kap karah rin loh takin a lut a, Brighton in goal an chhuah.
Hma taka goal a luh hnuin inkhel a hmuhnawm zui viau a, goal thun tumin an innawr tawn nasa hle. Hun tha nei ve ve mah se an hun tha neih an chhawr tangkai thei lo ve ve a, Arsenal in Brighton lakah hnehna hlu tak an chang a, point thum hlu tak an hmu.
Arsenal chakna goal thuntu Bukayo Saka lakah Aesenal tantute beisei a sang viau thin. Beiseina sang taka an thlir leh an inghahna lian ni chungin Saka hi hun pawimawhah a reh a, boruak sangah beisei a phak lo leh tlat thin. Beisei a phak loh vangin sawisel pawh a hlawh hman viau nghe nghe. A laka beiseina sang tak nghattute beisei ang ngeiin Brighton lakah chakna goal a thun a, an team a chakpiui ta a ni. He goal hian Saka tan phurna leh inrintawkna sang zawk a pek ngei a beiseiawm.
City an chak zo lo
Mimualah Arsenal in hnehna an chan laiin table-ah pahnihnaa awm mek Manchester City chuan Etihad Stadium-a an mikhual Nottingham Forrest lakah hnehna an chang zo lova, point hnih hlu tak an hloh.
Arsenal nawr tawm zui zel tura chak mamawh City hian an mual Eithad Stadium-ah bul an tan tha thawkhat viau a, goal thun hmasa zawkah an tang nghe nghe. Inkhel hmuhnawm takah goal lut a awm theih loh reng hnuin chawlhlawk dawn hnaihah City in goal an thun. Pep Guardiola team te hian fuh takin an mikhualte an nawr tlang a, Rayan Cherki siamsak tha tak chu Antoine Semenyo chuan awlsam takin a pet goal a, minute 31-naah hmahruaina goal a thun. Semenyo goal thun hmang hian City in 1-0 a hmahruai chungin chawlhlawk an hmang zui ta nghe nghe.
Chawlhlawk hnu lamah inkhel a hmuhnawm chhunzawm a, tlahniam hlau Nottingham Forrest in goal an thun thuai. Minute 56-na lekah Morgan Gibbs-White chuan mawi, tha, mak leh dangdai takin a kheng goal a, an si phurh a sut. City laka Gibbs-White si phurh sutna goal thun hi English Premier League-a goal mawi leh ropui zingah chhiar tel zel tawh a nih a rinawm.
Goal chhuah bawk mah se City an hnual rei lova, hma an hruai nawnna goal an thun leh thuai. Chak mamawh City tan hian Rodri chuan minute 62-naah hma an hruai nawn lehhna goal a thun. Hma an hruai nawn leh hnuin City hian an mualah chak theihna hun tha tak an nei a, point thum hmu ngei tura ngaih an ni hman hial nghe nghe.
Chak theihna hun tha tak nei bawk mah se City in an hmahruaina an hum rei thei bik lo. Penalty an beisei thlawn hnu lawkah fuh takin mualneitu team an nawr tlang a, club lian hrang hrang ten an awh rawn Elliot Anderson chuan Minute 76-naah fuh zetin a pet goal a, an si phurh a sut nawn leh.
2-2 a nih hnuin inkhel a hmuhnawm zui viau a, City in chak ngei tumin tan an khawh nasa hle. Hun tawp dawn tepah City hian goal an thun teuh hle a, Nottingham Forrest in goal line atangin an dang thei hram a, mak tak maiin team lian City lakah tlawm an pumpelh. City lakah tlawm an pumpelh vangin Nottingham Forrest hian tlahniam an pumpelh hram rih a, him tumin tan an khawh zui nasa hle ngei ang.
Point 7 in Arsenal an sang fal
Brighton lakah hnehna an chang vangin Arsenal in point thum hlu tak an hmuh belh a, Manchester City lakah an hmahruaiana an tizau leh zual. Arsenal in hnehna chang bawk mah se City an chak chuan an hmahruaina chu point nga tho a ni dawn a, khelh khata an khelh tam zawk bawk si vangin Arsenal hmahruaina a pan thei viau dawn. Heti a nih vang hian City result-ah Gunners an innghat thui viau bawk.
Arsenal an chai laiin pahnihnaa awm mek Manchester City in an hneh ngei tura ngaih Nottingham Forrest lakah mak tak maiin hnehna an chang zo lo hlauh a, Arsenal in point 7 in hma an hruai theih phah. Point 7-a hma an hruai vangin Arsenal in champion an hnaih.