Arsenal leh City an inumfal zel

April 1, Inrinni zan khan English Premier League 2022-23 khelh chhunzawm a ni a, champion tuma inum fal Arsenal leh Manchester City ten hnehna an chang ve ve. Arsenal leh City ten nuamsa taka hnehna an chan laiin Chelsea an talbuai chhunzawm thung a. Stamford Bridge-ah ngei Aston Villa laka tlawm Chelsea hi top 10 huang atangin hnawh-chhuahh an ni.
City lakah Reds an chuai
Inrinni zana inkhel hmasa ber leh inkhel ngaihven hlawh berah champion lai Manchester City chuan Etihahd Stadium-ah Liverpool an mikhual. City hian an mikhual Reds lakah goal chhuah hmasa mah se tha zetin an chhang let a, 4-1 a hnehna changin Arsenal an um tawm zel. Liverpool an sawp tum hian City goal thun khawl Erling Haaland chu hliam vangin a inlan thei lova, Haaland tel lo mahse goal li ngawt an thun tho thung.
Inkhel ngaihven hlawh takah hian Liverpool in bul an tan tha a, minute 17-na lekah Jota siamsak atangin Mohamed Salah chuan hmahruaina goal a thun. Liverpool in goal an thun hmasa hian inkhel a tihmuhnawm leh zual a, Liverpool tantu leh Arsenal tantute an phur hman viau. Goal an thun hmasa hian sapui muthlu an kai harh a ni ta lek fang a, City er an khan lo ta han han hle.
Liverpool hian goal thun belh tumin an khingpuite an nawr a, an chetsual phah ta thung. City hian tha zetin an nawr let a, vei lam sir atanga Jack Grealish siamsak tha tak chu Julian Alvarez chuan awlsam takin a pet goal a, minute 27-naah an si phurh a sut. 1-1 a nih hnuin an innawr tawn viau a, chawlhlawk hmain goal an thun belh thei lo ve ve a, 1-1 a inhnehtawk chungin chawlhlawk an hmang.
Chawlhlawk hnu lamah City in bul an tan tha viau a, goal an thun hma ta viau. Second half tan atanga minute khatna lekah Mahrez siamsak atangin Kevin De Bruyne chuan goal ruakah a pet goal a, hma an hruai letna goal a thun. De Druyne goal thun hnu lawkah City hian goal dang an thun belh leh nghat zat. Minute 53-na lekah captain Ilkay Gündogan chuan hnaite atangin a pet goal a, an hmahruaina a tizau.
Team lian lakah si hnih ngawta hnufual zawk an nih hnuin Liverpool an insiamtha thei lova, goal thun turin an khingpuite an nawr tlang thei meuh tawh lo. Chak chiang tluka ngaih ni tawh City hian goal an thun belh zui leh. Fuh taka ball an inpek tawn hnuin Kevin de Bruyne siamsak tha tak chu Jack Grealish chuan minute 74-naah a pet goal a, an goal lina thunin, a tawp a khar. Hun tawp thlengin goal dang a luh belh thei tawh lova, Manchester City chuan an elpui lian, an kawng dal thei tur zinga ngaih Liverpool chu 4-1 in an sawp a, inkhel ngaihven hlawh tak kha inkhel besei phak lovin a tawp.
An mualah awlsam taka point thum an hmuh vangin City hian an chunga awm Arsenal nen an inkar an tizim a, Leeds United mikhual zui mai tur Gunners lakah pressure tam zawk an siam. Arsenal in 4-1 tho a Leeds an hneh vangin an inkarah point riat tla zep zui leh mah se City hian champion nawn leh beiseina an nei sang tial tial thung.
Arsenal an chesual duh lo
Manchester City in Liverpool an hneh hnu lawkah Leeds United hmachhawnin Emirates Stadium-ah inlan in, chak an mamawhna sang leh zual mah se hun pawimawhah Arsenal an che sual duh lova, an mikhual lakah 4-1 thoin hnehna an chang.
Gunners hian an mikhual Leeds lakah khel tha viau mahse goal erawh an thun thei mai bik lo. Na taka an mikhual nawr rah an seng a, chawlhlawk hmain penalty an hlawhchhuak hlauh thung. Minute 35-naah Grabiel Jesus chuan penalty atangin hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah Arsenal an khel tha leh zual a, goal thum an thun belh. Minute 47-na lekah defender Ben White chuan Martinelli siamsak atangin an goal hnihna a thun a. Minute 55-naah Trossard siamsak atangin Gabriel Jesus chuan an goal thumna a thun zui leh. Hliamin hun rei tak a tihbuai Jesus hian a dam hnuin bul tanna chun a chang mai bik lo. Hmun chan ngei tumin tan a khawh a, Leeds United an hmachhawn tum hian manager Mikel Arteta chuan bul tantu zingah a telh ta nge nge a, a ti sual lo. Jesus hian goal hnih a thun ta hial a, Leeds an hneh theih nan a thawhhlawk hle.
Si thum faia hma an hruai hnu hian vanduaithlak ang reng takin goal an chhuah a, minute 76-naah Rasmus Kristensen chuan Leeds United tan a goal a thun. Goal khat chhuah bawk mahse hun tawp hmain laipui a puak nawn leh. Minute 84-naah Granit Xhaka chuan an goal hnuhnung ber a thun a. Goal dang luh belh lovin inkhel a tawp zui ta a ni.
An mualah 4-1 a chak Arsenal hian khelh 29 atanga point 72 hmuin hma an hruai fal zui zel a, champion tumin hma lam an pan zel. Khelh hmabak pakua an la neihah an hnuai chiaha awm Manchester City an hmachhawn a ngai dawn a. Etihad Stadium-ah an chak nawlh a nih chuan Gunners hi champion turinan dinhmun a tha viau tawh dawn. City lakah an tlawm nawn leh a nih erawh chuan Liverpool leh Chelsea hmachhawn tur an la nih bawk vangin champion an beiseina a chuai phah viau thei thung.
Chelsea an tlawm leh tawh
Inrinni zana inkhel dangah team lian Chelsea chuan beisei an phak lo leh pek a, Stamford Bridge-a an mikhual Aston Villa lakah si hnih faiin an tlawm. An mualah an tlawm vangin Chelsea hian top 10 huang an luah phak tawh lova, 11-naa an tlahniam tawh. Sum tam tak seng chunga champions league em pawh an khel phak lo a nih chuan Blues tan mualphona lian tak a tling ngei dawn. UCL khel phak turin champions League-ah champion thei dinhmunah an la ding thung a. Real Madrid paltlangin champion an tum ang.
Chelsea hian an mualah bul an tan tha lova, goal an chhuah hma viau. Minute 18-na lekah an tlarhnungte chetsual vangin Aston Villa in goal thun theihna hun tha an nei. Ball um faltu Ollie Watkins chuan fuh zetin Chelsea si nghak a pet khum a, hmahruaina goal a thun. Chelsea hian an si phurh sut ngei tumin tan khawh zui chiam mah se an vanneih ni a ni lo ve bawk a, an goal thun hnawlsak an nih bakah penalty an beisei thlawn bawk.
Dinhmun derthawng tak chunga an him hram hram hnuin Villa in goal an thun belh leh nawlh. Fuh taka ball an inpek hnuin John McGinn chuan minute 56-naah tha zetin a pet goal a, an goal hnihna a thun. Hun tawp thlengin goal dang a luh belh thei tawh lova, Chelsea chu an mualah ngei an tlawm a, top 10 huang atangin hnawhchhuah an ni zui ta a ni.