Arsenal leh United te an chak

Thawhleh zan khan UEFA Champions League group Stage khelh chhunzawm a ni a, English Premier League club pahnih; Arsenal leh Manchester United ten hnehna changin point thum an hmu. Arsenal hian La Liga club ian Sevilla an hneh a. United hian Old Trafford-a an mikhual FC Copenhagen an hneh ve bawk.
Arsenal tan Brazilian in an thawhhlawk
EPL season kal meka khel tha, tlawm nei lova kal tluang mek Arsenal chuan Ramón Sánchez-Pizjuán-ah Sevilla an luhkhung a. Brazil player pahnih Gabriel Martinelli leh Gabriel Jesus te goal thun hmangin hnehna an chang. Sevilla lakah an chak leh tak vangin Arsenal hian khelh thum atanga point ruk hmuin, Group B hmahruaitu thar an ni.
Arsenal hian an lenluhna mualah an khel tha thawkhat viau naa, goal an thun lawk thei lo. Chawlhlawk hmain goal a lut thei dawn lo emaw tih hnu minute 45+3-ah Gabriel Martinelli chuan Gabriel Jesus siamsak atangin hmahruaina goal a thun. Martinelli goal thun hmangin Gunners hian si khat faia hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, goal khat ve ve an thun. Second half tan tirh minute 53-naah Declan Rice siamsak atangin Gabriel Jesus chuan Gunners goal hnihna a thun a, an hmahruaina a tizau. Goal hmahruai siamchhuaktu leh an goal hnihna thuntu Jesus hian hliam a tuar zui a, a hliam vang hian a chawlh deuh rih a ngaih phah dawn. City atanga Arsenal a zawm hnuin Jesus hi a inhliam ta malh malh a, a theihna sang ber London club lian tan a lanchhuahtir thei rih lo.
An mualah si hnih an phurh hnuin Europa League champion Sevilla in goal thun ngei tumin an mikhualte an nawr a, goal an thun ta nge nge. Minute 58-naah Nemanja Gudelj chuan Ivan Rakitic siamsak atangin goal an thun a, an si phurh a sut then. An si phurh an sut hnuin beiseina sang zawk an nei a, an mualah point hlawhchhuah ngei tumin tan an khawh zui nasa hle. Goal thun tumin innawr tawn chiam mah se goal dang a luh belh thei tawh lova, Arsenal chuan hnehna pawimawh tak changin, point thum hlutak an hmu.
Group B a inkhel dangah hmahruaitu Lens leh PSV Eindhoven te chu 1-1 in an inhnehtawk. Arsenal hnehtu Lens an chak zawh loh vangin Arsenal in table chung ber an luah theih phah a, Ligue 1 lian Lens hian point 5 hmuin pahnihna an luah a. Sevilla leh PSV in point hnih ve ve an hmu mek.
Onana leh Maguire chet that zanah United an chak
Premier League club lian Manchester United chuan Old Trafford-ah an chung chiaha awm FC Copenhagen an mikhual a. Harry Maguire goal thun hmanga hnehna chang mialin, Group A-ah pathumnaah an inhlangkai.
FC Copenhagen an mikhual tum hian sawisel hlawh pahnih Harry Maguire leh Andre Onana te an khel tha dun ve teh mial a, an team an chakpui ve teh tlat. Fiamthu thawh nana hman nasat tak Harry Maguire hian minute 72-naah Christian Eriksen siamsak atangin goal a thun a, hei hi Februay 2022 hnu lamah United tan goal a thun leh hmasak ber a ni. Maguire-a’n goal a thun mial bakah hian si nghak sawisel hlawh tak Andre Onana chuan penalty a save mial bawk a, a team a chhan him ve bawk. Maguire goal thun hmanga hnehna chang United hian UCL 2023-24-ah a vawikhat nan hnehna an chang.