Arsenal leh Villa an tlawm

November 6, Nilai zan khan UEFA Champions League 2024-25 khelh chhunzawm a ni a, English Premier League club pahnih; Arsenal leh Aston Villa te an khingpui hneh lovin an tlawm ve ve. UCL round 4-ah EPL club pathum an tlawm a, Liverpool chu hnehna chang awmchhun an ni.
London club lian Arsenal hi Italian champion Inter Milan hmachhawn turin Stadio Giuseppe Meazza-ah an leng lut. An lenluhna mualah khel chhe hran lo mah se goal-ah an vanduai a. Penalty an chawi bawk vangin tlawm zawkah an tang. Khelh thum atanga point 7 hmu tawh Inter Milan hi an mikhual Arsenal lakah an vannei a, chawlh dawn tepah Gunners midfielder Mikel Merino handball vangin penalty an hlawhchhuak. He penalty hi Hakan Çalhanoglu chuan awlsam takin a pet goal a, minute 45’+3-ah hmahruaina goal a thun a. Inter Milan hian 1-0 a hmahruai chungin chawlhlawk an hmang.
Chawlhlawk hnu lamah Arsenal an khel tha zui viau a, goal pawh an thun teuh thei hle. Goal thun teuh thei viau mah se Inter Milan an him hram hram a, goal line bul lawk atanga petchhuah hram an neih bakah Declan Rice pet kual mawi tak chu si nghak Yan Sommer chuan pui takin a dang teh mial lo. An khingpuite nawr tak chungin goal an thun thei lo tluan a, Inter Milan lakah uiawm takin an tlawm zui ta a ni.
Arsenal hnehtu Inter Milan hian Champions League season tharah an khel tha viau a, tlawm an la nei lo. Match li-ah vawi thum an chak tawh a, draw vawi khat an nei tawh. An chak zawh loh awm chhun hi Arsenal nen an inhnehtawk hi a ni. Khelh li atangin point 10 an hmu a, paruknaah an awm mek. Hetihlai hian Arsenal erawh chuan khelh li atangin point 7 an hmu a, 12-na an luah ve thung.
Champions Leaue a bul tan tha, an khelh hmasak pathumah chak zawna hmahruaitu ni hman hial Aston Villa chuan Jan Breydelstadion mualah Club Club Brugge an hmachhawn a, uiawm takin an tlawm.
Villa hi an len luhna mualah an khel chhe lem lo viau a, goal thun theihna hun tha pawh an nei. Hun tha an nei chungin goal an thun thei lo tluan teh tlat thung. Villa in goal an thun theih loh reng laiin mualneitu Club Brugge erawhin vanneih thlak takin goal an thun tlat thung. Thla 14 chhung zet hliam vanga chawl tawh Tyrone Mings a chesual a, ho takin penalty a chawi. He penalty hi mualneitu tan Hans Vanaken chuan minute 52-naah a pet goal a, Villa lakah an chakna goal a thun.
Club Brugge lakah an tlawm vangin Aston Villa hian an hmahruaina an hloh fel a, khelh li atanga point 9 hmuin pariatna daihah an tlahniam. Hetihlai hian Club Brugge erawh chuan khelh 4 atanga point 6 hmuin, 22 na an luah ve thung.
Champions League round 4-ah EPL club a che tha lo viau a, Manchester City, Arsenal leh Aston Villa te an tlawm vek a. Liverpool chiahin hnehna an chang. Reds hi UCL season kal meka chak vek awmchhun an ni nghe nghe.