Arsenal mikhual tur Manchester United

Football ngainatuten kar tawp an nghahhlelh chhan English Premier chu zanin leh naktuk zanah khelh a ni leh dawn a. Kar tawpa inkhel ngaihven hlawh ber chu Arsenal in Manchester United an mikhual tur hi a ni ang.
Arsenal leh United te hi England tualchhungah club ineltawk tak an ni reng a, inkhel hmuhnawm an lantir thin. Tunhnai Premier League leh FA Cup-a an inkhelh hnuhnung vawi 10-ah pawh an inhnehtawk thei hle. An intum hnuhnung vawi 10-ah hian Arsenal an chungnung hret a, vawinga an chak a, United vawi thum chakin, vawi hnih dang an inhnehtawk. Pre-season-ah khan USA lama an inhmachhawn tumin United hi chak zawkah an tang ve thung. Emirates Stadium-a an inhmachhawn hunah pawh an inhnehtawk leh viau tura ngaih an ni a. Mualneitu an nih vangin Gunners hian chak theihna hun tha an nei zawka ngaih a ni.
United hi an mual Old Trafford-ah an khel tha viau a, tlawm an nei khat hle. Hetihlai hian Mimualah erawh chak an harsat khut thin. Season tharah pawh hian Tottenham hneh lovin an lo tlawm tawh a. Arsenal an hmachhawn hunah pawh chak an awlsam dawn lo. An khingpui tur Arsenal hian season kal mekah tlawm an la nei lo va, United lakah hnehna an chang thei a nih chuan chammpion an tumna kawngah inrintawkna sang zawk an neih belh ngei ang.
Gunners leh United hi inelna hrang hrangah vawi 197 an inhmachhawn tawh a. United vawi 83 an chak a, vawi 47 zet an inhnehtawk tawh bawk.