Arsenal mikhual tur United

Kar a tawp a, kar tawp nghahhleh nachhan inkhel ngaihven hlawh tak a awm leh dawn. Kar tawpa inkhel tur zingah Arsenal in Manchester United an mikhual tur chu inkhel ngaihven hlawh ber a ni ang. Arsenal an hmachhawn tur hi Michael Carrick-a enkawl United tan fiahna tak tak a ni ang.
Season kal meka inelna hrang hrangah Arsenal hi an khel tha viau a, English Premier League-ah leh UEFA Champions League-ah table chung ber an luah ve ve. UCL-ah phei chuan vawi sarih chak zawn thei awmchhun an ni a, last 16 lut chiang hmasa ber an ni nghe nghe bawk. Gunners hi an mualah an khel tha leh zual a, season kal mekah hian an mualah tlawm an la nei miah lo. Hneh theih loh ang maia inlan a, vawi 49 zet tlawm nei lova an kal tluang lai titawptu kha United te hi an ni a. An mualah tlawm nei lova an kaltluang lai titawp theitu pawh United bawk hi ni leh thei dinhmunah an ding.
Tarlan tawh angin Arsenal hi inelna hrangah hrangah an khel tha hle. EPL ah point 7 in hma an hruai fal mek a, Champions League-ah last 16 lut tawhin, Carabao Cup semi-final-ah vawi khat an chak tawh a, FA Cup-ah champion tura rinkai an ni mek bawk. Hun rei tak an nghah tawh trophy an nghakchhuah ngei a rinawm ta hle.
Arsenal an khelh that tluan laiin United tan erawh season tha lo tak a ni thung. United hian European competition an khel phak lova, Carabao Cup leh FA Cup atangin an tla fel tawh bawk. EPL hmahruaitu Arsenal nen hian an inkarah point 15 zet a tla zep tawh bawk a, an tan champion a har tawh viau dawn. Heti a nih vang hian kut bengin season an thlahliam dawn a nih hmel viau a. An tum san ber tur chu champions league khel pha tura top 4 huang luah phak a ni ang.
Reubel Amorim hnuaiah beisei phak lo thin mah se manager lai lawk Michael Carrick hnuaiah United an vul nghal thung. Carrick hnuaia inkhel an hmachhawn hmasak berah an elpui lian Manchester City an hneh nghal a, hei hian United a chawk phur hle. City hneh thei an nih miau vangin Arsenal pawh hneh thei turah an inngai ang a, inringtawk takin an inlan ang.
Arsenal hian thawhleh zan khan Inter Milan chu an tualzawlah ngei 3-1 in an hneh a, an inringtawk lo bik hauh lo ang. UCL khel zui leh dawn bawk mah se last 16 an lut chiang tawh a, an player thate an khek thei dawn. Gunners hi an player hliam te an dam tan a, tlarhmaah phei chuan duh thlan tur an nei tha viau. United hneh thei tur thlang dawn ila Arsenal hian thlan hmasak an hlawh a rinawm.
Arsenal leh United hi EPL season kal mekah vawi khat an inkhel tawh a, Old Trafford-ah ngei Arsenal an chak. Anni pahnih hi vawi 244 an intum tawh a, vawi 102 chakin United an chungnung zawk a, vawi Arsenal hi vawi 91 chak ve tawhin, vawi 51 zet an inhnehtawk tawh bawk a, team intum tawk tak an ni.