Arsenal transfer kalpui dana lawm lo Arteta

Arsenal transfer kalpui dana lawm lo Arteta
Manager Mikel Arteta chu tun thlasik transfer hun tawi inhawn chhunga Arsenal-in player thar an sengluh loh avangin a lawm lo a, chutih rualin an club inthununna tha tak erawh a fak thung.
Thla hmasa mai khan khup hliam daih rei chi (anterior cruciate ligament injury) an tih avangin Gabriel Jesus chu inkhel thei loin a bawksawp tan a, tun season-a inlan thei tawp lo tura ngaih a ni a; Bukayo Saka pawh chawn tha na atangin a la kir thei lo; hei vang hian Arsenal chu attacker thar lei tura ngaih an nih laiin January thlaah Gunners neitute’n player thar leina’n sum an phawrh lo a, Arteta ngaihdan a ni lo.
EFL Cup semi-final second leg-a Newcastle an hmachhawn dawn khan Arteta chuan he thu hi sawichhuakin, “Transfer hun inherchhuah laia kan duh ni thin lo thei lo chu danglamna thlen thei player thar hmanga squad thuamchak hi a ni a, player inhliam nei chung chuan tum anga chet a harsa thin,” a ti.
Arteta news conference hma lawk hian football finance expert Kieran Maguire chuan sumdawnna zawna Arsenal tlakchham sawichhuakin, bazar-pui lama player thar lei kawnga an harsatna tawh dan a sawi ve bawk.
Tun January thla chhung khan player pathumin Arsenal an chhuahsan a, an zinga pahnih chu defender ve ve, Manchester United lama kal rawlthar kum 17 mi Ayden Heaven leh Wigan Athletic zawm ta kum 20-a upa Josh Robinson-te an ni.
A dang leh chu Brazilian attacker Marquinhos niin, tun season la bang zawng tan loan-in Cruzeiro lamah an chhuahtir.