ARTIFICIAL NEST BOX SIAM DAN LEH DAH DAN

By K. Lalmuansangaa Zotei Pa, ASEP
Artificial Nest Box siam dan hre duh kan awm niin a lang a, hriat ber vang ni chuang lovin a kalkawng kan hriat theih nan ka’n tarlang ang e aw.
MODEL-1 THINGTUM HMANGA SIAM: Thing tangkai tawh lem lo, tlu ro mai mai tawh kha feet 1 vela seiin tan bun tur a ni a, a lai takah phel tirin kan rek khuar ve ve a, a lehlamah a luhna tur kua (hole) verh tur a ni a. Chu chu kilh belhbawm leh mai tur a ni. Hei hi a natural em em a, a tha hle bawk. Hetiang siam duh avanga thing ding tha lai kih erawh tih hauh loh tur a ni.
MODEL-2 IN TE SAK: Thingphek a lai taka zai phel thlakin feet chanve (6 inches) vel lek leka tan tur a ni a, chu chu in te anga sak pum mai tur a ni. A hma lamah a luhna tur kua (hole) verh leh mai tur.
MODEL-3 A TUNG SEIA SAK: Thingphek a lai taka zai phel thlakin feet 1 vela tan bun leh hnu-ah rectangle shape-a kilh pum leh tur a ni a. A mawng atanga kutphah bawk vela sangah a kua (hole) verh leh mai tur a ni.
HRIAT TUR DANG:
(1) Dah dawn hunah thli lo kal dan kan en ang a, thli dawng tam lo zawng zel a kua (hole) hi hawitir tur a ni.
(2) Natural thei ang ber a nih theih nan rawng hnawih te, nawh mam te tih loh a tha mah zawk.
(3) A chhungah engmah dah a ngai lo va, a luahtu turte hian an mamawh chu anmahni thiar khawm ngei an duh ber.
(4) An luah hunah lawm avanga en sek chin loh tur.
(5) Mahni nest box hi hun lo kal zel tur atana hman zel duh dawn chuan hawn theih turin kawpza pawh dah theih a ni.
THIL DANG: Nest box atan hian hmanraw chhia nia kan ngaih tam tak hi a hman tlak nual mai. Thingphel chhiate pawh kilhkhawm mai theih a ni.
Tin, Septic tank pipe hluihlawn tawhte pawh hi a awm tawka tan bunin, a chung leh a hnuai tih phuia kua siam chuan an lawi duh em em tho.
Hman lai deuhva kan uar sound box chhiate pawh nei kan awm chuan hman mai theih a ni a, a kua a len avangin chhimbukte pawh an lawi ve duh tho mai.
THIL DANG LEH: Heng artificial nest box te hi ngaw leh bu chhehna tur an la neih thatna hmunah chuan tih (Practice) kher a ngai chuang lo va, anmahni siam hi an duh ber. In bul hnai leh khawpui hmuna practice deuh chi a ni.