Artist-ten workshop nei

Information & Public Relations department leh Mizoram Art Development Society (MADS) tangdun buatsaih ‘MADS Annual Art Workshop cum Seminar’ June 27-30 thleng awh tur chu Thawhlehni khan Aizawl Art Gallery Khatla-ah hawn a ni.
Workshop hawngtu I&PR joint director F Lalfakzuala chuan lemziakmite chu mi bik, mi zawng zawngin an tih theih loh rohlu nei an ni, tiin, an thiamna tipung zel tur turin a chah. Artist-te lemziah leh lemtuk mawi takte chuan ngaituahna a tikalthui thei hle a, mi lungngaite hlimna thlen theitu an ni tih hrereng tura chahin, hmasawnna thlentu leh hnam ziarang humhalhtu ni turin a duhsak tih a sawi a. Mizo zingah artist thiam tak tak inphum ru an awm teuh a rin thu sawiin, artist-te zawnchhuaha tihhmasawnna tura MADS a ding chu ropui a tih thu a sawi bawk.
Aizawl leh Mizoram hmun hrang hrang atangin member 64 an tel a. Seminar-ah hian master of fine arts (sculpting) Andrew Lalremruata leh master of fine arts (painting) Isaac Malsawmtluanga ten sculpting leh painting chungchang an sawi a ni.