Arvind Kejriwal an kum 2017 hnuah PM Modi bei tan leh tawh

Delhi Chief Minister Arvind Kejriwal chuan a ze tak tak a chhuah leh tawh tia sawi a ni. Prime Minister Narendra Modi chu hriam takin a bei zui a. Insumkarna reng a nei lo, tun hnaia a insumna pawh thlahdulin mimal tak pawhin a bei zui leh a.
Delhi assembly-a thusawina a neihah Narendra Modi chu “under-educated” tia sawiin, issue hrethiam hauh lo a ti zui bawk. Chu mai a ni lo ‘most corrupt PM’ ti zuiin chumi sawina behchhan a neih chu Modi sorkar chuan Adani lakah engmah tih a nei lo va, Adani-Hindenburg case ah pawh Joint Parliamentary Committee (JPC) probe a duh thak lo a ti bawk.
Kum 2017-a Punjab election a chakna an chan loh hnuah Kejriwal chuan Modi chu a bei chhunzawm zui tawh miah lo tia sawi thin a ni a. A hnu lawkah MCD inthlanah a chak lo zui bawk a. Modi beih chhunzawm zel chuan amah a lar vang lai a ni si a, amah thlawptute a tilungni lo zawk zel an ti a, hei vang hian Kejriwal chuan a beih chhunzawm lo tia sawi a ni.
Mahse, tun hnai teah mimal taka Modi a beihna chu a chhunzawm tha leh a, eng nge thleng le?
Kum 2017 hnuah India politics a inthlak danglam nasa hle. Modi-an term hnihna a chelh zui mai a ni lo, thil a ti thei zual a, kum 2019 hnuah kum 2014 atanga 2019 inkar aiin inthlanah a chak tam zawk bawk.
Emergency hnuah Prime Minister ni tawh zinga sorkar leh constitutional institution thunun nghet bera ngaih a ni mek bawk a. Chu mai ni lovin central agency te nasa taka a duh dana hmangsuala puh a ni bawk a. Enforcement Directorate leh CBI te chu India constitutional history ah tun ang renga tihbaiawm leh hlauhawma an awm a la awm ngai ;lo. ED leh CBI tena political case an neih 90 per cent chuang te chu opposition leader te niin hruaitu lawk tak tak in lung in bang an zut mek a.
India democracy chu probe agency te hijack-in a awm mek tia sawi niin chutah chuan Arvind Kejriwal-a Aam Aadmi Party (AAP) te chu a tuar nasa ber niin Delhi minister pahnih chu Lung Inah khungin an awm mek.
Manish Sisodia chu Anna Hazare a Lokpal movement poster boy a ni a, thla khat chuang ED custody-ah awm mekin a chhuah hun tur hriat a ni lo. Sisodia chu Delhi liquor scam a puh number one a ni mek a, Sisodia chu Delhi administration laimu zinga tel niin AAP tena an chhuantawlawl education model architect a ni bawk.
Satyendra Jain chu Tihar jail ah kum khat dawn a tang tawh a, eiruk thubuai nei niin a chhuah hun tur hriat a ni hauh lo bawk. AAP member pawimawh tak communication in-charge Vijay Nayyar pawh thla ruk lung inah a tang mek tawh bawk a, Kejriwal nena inhnimhnai zual bera ngaih a ni.
Kejriwal pawh zim hnaih tial tiala awmin a chenna In leh office te pawh dapthutin a awm tawh a, AAP leader chuan an hruaitu man te chu nghaisakin an awm a ti bawk a. Mahse, Kejriwal chu India-a hruaitu lawk leh langsar ber zinga mi niin agency te namnul harsa tak tur a ni a, Delhi liquor scam chuan a hmel tibal deuh mah se, IIT alumnus leh bureaucrat hlui eirua puh tum chu mipui nawlpui te pawm harsat tih em em a ni dawn thung.
AAP te hi Modi sorkarin BJP te an hneh theih em avanga bei leh thlurbing tia sawi an ni a. Delhi khawpuiah tum khat mai ni lo tum hnih an hneh tawh a, MCD an laksak bawk a. Punjab ah an hneh a, Gujarat ah meuh pawh AAP ten kua an hreuh tawh bawk a.
Kejriwal chu Modi chotu langsar ber ni tawha ngaih niin AAP te chu ram pum huapa BJP te tana hlauhawm ni tawha ngaih an ni bawk.
Opposition leader dangte ang lo takin Kejriwal leh a team te chuan public platform ah ‘Jai Shri Ram’ tia aurual an hreh leh miah lo va, a sorkar chuan senior citizen te Ayodhya ah a thlawna kalpui a tiam bawk a, BJP te Hindutva symbol zei taka chhuhsaka Hindu voter te nena inzawmna siam tumna lamah an che mikhual hauh lo.
Kejriwal chu social media platform hmang thiam chungchuanga ngaih a ni a, hardcore politics master a ngaih a ni bawk. Rahul Gandhi aiin Modi tana hlauhawm zawka ngaih niin Kejriwal leh a team te chuan Modi laka nem chuan khawimah a thlen dawn lo tih an man.
AAP te chuan Modi beih loh chuan engmah hlawkna a thlen lo tih an man fiah tawh a. Modi an beih loh chhungin AAP sorkar beihna a nasa zawk daih tawh a, AAP te chuan Najeeb Jung leh Anil Baijal te hnuah leh VK Saxena an Lieutenant Governor nihna a chelh thlengin harsatna hlir an tawk bawk.
Manish Sisodia man a nih hnuah Kejriwal chuan Modi nena inzawmna tha awm thei tura a ngaihna a bo vek a. Ngawih chuh nge beih let tih chu a duhthlan tur niin beih let a thlang ta nia ngaih niin Adani issue inher nen a bei ta chat mai a ni.
Rahul Gandhi chu Adani issue ram pum huapa sawi hlawha siamtu ber niin a man a pe bawk a. Parliament member a nihna chhuhsak a ni a, mahse, Modi laka tlawm a tum hauh lo. Kejriwal-ah Rahul Gandhi chuan ally fing tak leh social media savvy a neih belh bawk.
Kejriwal-an Delhi assembly-a Modi mimal taka a beih vak kha ruahman sa diam niin thil pathum thlurbing a nei an ti a. Pakhatna chu agency tena nakina an la man ve a nih chuan public interest sawi nasat avanga martar anga ngaih a ni thei ang. Pahnihnaah chuan AAP core value leh an pianchhan eirukna beihletnaa an dinhmun phet tan neih let lehna tur, leh pathumna chu opposition leader nihnaa a dinhmun siam that nan niin eng vagin nge Rahul Gandhi chuan credit a lak vek bik ang? Kejriwal chuan fimkhur takin chhut dip dep lovin chet a la ngai lo va, hunin eng nge a lailan dawn hriat a ni lo.
Modi hrefiah tan chuan game hlauhawm tak a ni tih an hre thung a. Mahse, Kejriwal chu dinhmun ngaia lungawi mai mi a ni lo, hloh huama bawh mai ngam mi a ni a, gambler turu tak a ni.