ASEAN hotu lawk te inhmukhawm

Southeast Asian foreign minister leh an thawhpui ram top diplomats te chu Laotian capital-ah July 25 atang khan ni thum chhung awh tur inhmuhkhawmna an nei tan a, he hunah hian United States leh China te pawh telin Myanmar civil war, South China Sea boruak tang tak leh regional issue hrang hrang te sawiho a ni dawn a ni.
Vientiane a Association of Southeast Asian Nations inhmuhkhawmna neihnaah hian US Secretary of State Antony Blinken leh Chinese Foreign Minister Wang Yi te chuan inbiakna an nei dawn bawk a. Beijing leh Washington chuan helai region ah hian influence neih tumin hma an la ve ve reng a ni.
ASEAN nations — Indonesia, Thailand, Singapore, Philippines, Vietnam, Malaysia, Myanmar, Cambodia, Brunei leh Laos tan chuan Myanmar buaina chu agenda pawimawh ber niin remna a awm theih nana ‘five-point consensus’ an siam chu an kalpui hleithei lo.
Myanmar-a inkahhaina siam vat te, inbiakna ASEAN special envoy kaihhruaina hnuaia neih te, ASEAN channel hmanga humanitarian aid pekluh te bakah special envoy tena Myanmar an tlawh tura ruahman te chu Myanmar a military leadership ten an hnawl tlat avangin harsatna nasa tak an tawk mek a ni.
Heng bakah hian ASEAN ramte chuan inbiakna zau zawk Japan, South Korea, India, Australia diplomats te pawh telnaa economy, security, climate leh energy chungchang sawihona neih ni se an duh bawk a.
Heng bakah hian Cambodia-in Mekong River-a canal siam a tum chu a chuan hnuai lam Vietnam chuan a ecological leh security tana pawi thei tiin hlauhthawnna a nei a, heng bakah hian Laos a dam building project liantham tak kalpui tum te pawh sawiho tura chhawp zingah a tel.
Myanmar sipai ten elected government Aung San Suu Kyi kaihhruai February 2021 a an paihthlak hnuah ASEAN ram te chuan top-level meeting-ah Myanmar political representatives an tel ve an phal lo va, an aiah bureaucrats te an tel thin a ni. Tun tum inhmuhkhawmnaah pawh hian Myanmar Foreign Ministry permanent secretary Aung Kyaw Moe chu a tel dawn a ni.
Myanmar civil war chhuah hnuah mi 5,400 chuangin nunna chan tawhin mi 27,000 chuang sipai sorkar in an man tawh tiin Assistance Association for Political Prisoners te chuan an sawi a. Mi maktaduai 3 chuang in leh lo chhuahsanin an awm tawh a ti bawk.
Myanmar ram chhunga civilian te tawrhna nasa tak tawhah humanitarian assistance pek dan tur chu ASEAN talk a ngaih pawimawh a ni dawn bawk niin Bolbongse Vangphaen, head of the Thai Foreign Ministry’s department for ASEAN chuan a sawi.
Thailand hian Myanmar nen ramri neiin humanitarian assistance a pe hnem tawh niin Bolbongse chuan a sawi a. ASEAN Coordinating Center for Humanitarian Assistance on Disaster Management hmanga ruahmanna kalpui leh mek a nih thu a sawi bawk.
Dulyapak Preecharush, professor of Southeast Asia Studies, Bangkok’s Thammasat University chuan ASEAN te chuan Myanmar ah remna a awm theih nan hma an la reng chungin hmasawnna a muang a ti a. ASEAN chauh ni lo China leh India pawh major player an ni tho tiin a sawi a. China leh India te chu ASEAN meeting ah hian an tel ve ve bawk.
Myanmar-a remna a awm theih nan chuan Myanmar nena ramri nei te China, India leh Thailand te ang chuan joint consensus an siam a ngai tiin a sawi bawk.
Chutih laiin ASEAN member Vietnam, Philippines, Malaysia leh Brunei te chu China nen South China Sea a tuipui ram inchuhin an buai ve reng bawk a.
South China Sea hi khawvel huap pawha waterway pawimawh ber a ni bawk a. Kumtinin South China Sea ah hian international trade 5 trillion dollar huin a paltlang ziah anga chhut a ni bawk.