ASF a nasa tawh lo

African Swine Fever (ASF) a nasa tawh lo a, a reh tawh tia sawi tur khawp chu la ni lo mah se a zia tawh hle. Tun ang a nih zel chuan a reh dawn hnai a ni mai thei.
AH&Vety department hotute’n ASF a zia tawh thu hi an sawi a, ‘Reh chu a la reh lo a, mahse a zia, vawk thi report a awm tawh lo tluk a ni,’ an ti.
Department-in an chhinchhiah danin, October ni 4-ah ASF vanga vawk thi a awm lo a, a awm loh vang vang hnuah ni 1-ah pakhat a thi. A thi zui lo a, ni 29-ah pathum a thi leh. Ni 16-a thi hi Lunglei district-a mi a ni a, ni 29-a mi hi Aizawl district-a mi, veng khata mi vek a ni.
October thlaah vawk thi report a awm meuh tawh lo hi thil lawmawm a nih thu an sawi a, a reh tan tia sawi ngam chu ni lo mah se tunah rih chuan a nasa lo telh telh tih a lan thu an sawi.
Nikumah khan vawk hi December ni 23 thlengin a thi a, thlasik laiin ASF hi kum dangah pawh a awm tho. Kuminah March-ah a leng tan leh. March ni 20-ah kuminah Mizoramin ASF a hre tan leh a, June leh July kha a nasat lai a ni. Mahse he hrilen hmasaknaah hian a reh a, hmun danga finfiah a nih chuan a tir lama mi-ah chuan a lo reh hman thin. Chuvangin kumin hian kum hmasa anga nasa chu a ni lo tiin a sawi theih ang. AH&Vety department hotute pawhin kum hmasate nena khaikhin chuan kumin hian a nasa lo tiin an sawi. Kumina a nasat lai, June leh July-ah pawh khan kum hmasa lam nena khaikhin chuan a nasa lo.
ASF hi 2021-ah Mizoramah finfiah a ni a, chumi hnu chuan kum tin a la leng. Kumin hian he hri vang hian vawk 9431 a thi tawh a, he hri vang hian vawk 3496 suat a ni tawh bawk.