ASF avanga vawk thi zat hlutna cheng vbch. 1000 a chuang tawh

ASF avanga vawk thi zat hlutna
cheng vbch. 1000 a chuang tawh
Vawk natna hri leng – African Swine Fever vanga vawk damlo thi leh he hri kai avanga an suat vawk chu a vaiin nuai 120000 chuang a ni tawh a, a hlutna suma chantirin cheng vaibelchhe 1000 chuang a ni tawh.
Kum 2021 atanga Mizoram-a leng tan ASF hian Mizoram a chenchilh tawh a, kumtin vawk engemawzatin an thih phah. State sawrkar chuan kum 2024 khan ‘state disaster’ ah a puang a, sawrkar laipui atangin zangnadawmna hmuh thin ni mah se, ASF kai nia hriat vawk an suat tih loh, he hri thihpuiah chuan pek theih a ni lo thung.
Kum 2021 atanga 2025 thleng khan ASF thihpui vawk 71912 an awm tawh a, vawk suat 52979 awmin, he hri in khua a luhchilh hi khaw 886 a ni. ASF kaihhnawiha vawk thi hlutna hi suma chantirin cheng vbch. 1008.49 a tling.
AH & Vety minister C Lalsawivunga chuan, India sawrkar thupek angin vawk suat chauh hi sawrkar laipui rate leh inangin compensation 50% centrally sponsored scheme (CSS) leh state matching share (SMS) hmanga pek theih a ni a. Kum 2022- 2023 leh 2023- 2024 chhung khan compensation atana sum mamawh zaa 25 (CSS & SMS) chauh an dawn avangin beneficiary hnenah zaa 25 pek an ni tih a sawi.
Ranvulhtuten an hloh nasat avangin kum 2024 khan ASF chu Mizoram sawrkarin ‘state disaster’ ah a puang a, hemi atan hian ran thi (suat tel loin) ralna, pakhat Rs. 4000 zelin mi pakhatah vawk 6 chin huamin sem chhuah vek a ni a. Ran vulhtute hlohna nasa tak avangin sawrkar laipui pawh theih ang tawka dawr an ni a, kum 2024 chhunga vawk suat compensation hi nuai 779.67 ve ve (CSS leh SMS), a vaiin nuai 1559.34, an sum mamawh atanga zaa 63.65 chu central leh state atangin an dawng ta tih a sawi a ni.
Thawhtanni khan AH & Vety minister hian kum 2024-a ASF vanga vawk suatte zangnadawmna, Aizawl district ami, zangnadawmna dawng tur thlan bik mi 10 hnenah cheque-in a hlan a, hemi rual hian district headquarters tinah an district-a a dawngtu tur hnenah sem tan ve nghal a ni.
Kum 2025 chhunga sum mamawh hi 2026- 2027 action plan-ah dil mek a ni a, 100% an hmuh theihnan chak taka bawhzui tum mek a ni tih a sawi a ni.
2021 – 2025 chhunga Mizoram ASF record
Kum Thihpui Suat Khua Hloh (in crores)
2021 33417 12568 272 334.14
2022 12795 11686 149 210.32
2023 1039 928 36 15.82
2024 14950 24177 258 336.49
2025 9711 3620 171 111.72
TOTAL 71912 52979 886 1008.49