ASF lengin zual lam a pan zel Nikhata thih tam ber chu nimin

Vawk hrileng – African Swine Fever chuan reh lam aiin zual lam a pan a, Mizoramah vawk 15000 chuangin an thih phah tawh. Tuna a len thawh thumnaah hian ni khata vawk an thih phah tam ber tum chu nimin, July 8 kha niin 734 an thi.
Tarlan tawh thin angin, Mizoramah ASF hi tum hnih a leng tawh a, vawk sing chuang ve ve in an thih phah. Tun tuma leng hi 2023 kumtawp lama intan nia ngaih theih ni mah se, kumin atanga chhiar tan a ni. Champhai district chu hri kai an hmuh hmasakna ber a ni a, thla 4 chuang chu he district-ah hian hri kai thar hmuh a ni tawh lo thung. Chutiang bawkin, hri kai hmuh hmasakna Lunglei district ah pawh a len chunzawm lohna a rei tawh a; heng district pahnihah hian khaw pahnih velah chauh hmuh a ni nghe nghe.
Khawzawl, Saitual, Aizawl leh Serchhip district-ah lutin, tunah chuan Mamit leh Kolasib district a tuam tawh bawk a. Chhimlam district pali chu a la him zui zel nia hriat a ni.
AH & Vety department chhinchhiah danin, kuminah July 9 thlenga ASF hri kai avanga vawk damlo thi 5321 an awm tawh a; he hri kai nia hriatchian vanga tihhlum/ suat 10040 an awm tawh. He hri hmuhna district 8-a khaw 159 a tuam tawh a; Aizawl district bakah district thenkhata ‘vawk farm’ siam a luhchilh avangin vawk thi hi a titam lehzual nia hriat a ni.