ASF vanga vawk thi leh suatnaah sawrkar cherang turin MLA-in ngen

Siaha khawchhung leh a chhehvelah African Swine fever (ASF) a leng zual leh a, he hri avanga vvawk thi phumna hmun chu Siaha bialtu MLA Dr K Beichhua hmalakna leh kaihhruaiin Local Administration Department leh AH & Vety atanga official-te bakah Joint Village Council leh Meisatla VC hruaitute nen Inrinni khan a hmuna enfiah a ni.
Siaha district khaw hrang hrangah ASF avangin vawk engemawzat a thi tawh a, Siaha bikah ASF vanga vawk thi leh suat (culled) hi hriat theih chinah 900 chuang a ni tawh a, an la thih belh zel a ni.
MLA chuan sawrkar term hmasa lam atang tawhin vawk pul hri (ASF) hian Mizoram pum nasa takin a nuai tawh a. Vawk tam tak a thi a, vawk vulhtu chhungkua tam tak eizawnna in nasa takin a tuar a. Mizoram sawrkarin sawrkar laipuiah nasa taka a nawrna azarah ASF lenna Mizoram district 10-a vawk vulhtute hnenah compensation pek an ni a, chutihlaiin vawk suat loha thi erawh state-in ‘disaster’ a a puan theih loh avangin compensation pek theih an ni lo tih a sawi.
“Tuna Siaha district-a thil thleng hi sawkarin ‘disaster’ ah a puang tawh a, chuti a nih chuan compensation pawh Disaster Management & Rehabilitation atanga pek theih dinhmunah kan ding a, a lawmawm hle. Chutih laiin suat leh suat loha thite compensation an pek thawm erawh hriat a la ni lo hi vawk vulhtute an lainatawm a, tun sawrkar pawh hian a la pe ngei turah beisei ang,” Dr K Beichhua hian a ti.
ASF leng hmasaah Siaha district a him a. Tun tumah erawh vawka an intodelh hlea an inhriat laiin ASF-in a luhchilh ve ta a, department lamin theihtawpa hma an la chungin khuahkhirh theih dinhmunah an ding ta loa, tuna an buaipui ber zawk chu vawk tamtak thi mek phum chungchang zawk a ni ber tawh tih bialtu MLA hian a sawi bawk.
Vawk suat leh thi phumna tur laih ringawt pawh excavator leh mihring tha tam tak a ngaih bakah bleaching powder leh chinai (lime) phul leh nilenga duty tur rawihna manah sum senna tur a tam avangin state Vety department pawhin tuna an hmalakna aia chak zawka hma la a, sum leh pai inphal deuh se a duh tih a sawi bawk.