Service rivalry nasa in hnathawh boruak a tichhia – Adviser to CM

Mizoram sawrkara hnathawkte zingah service rivalry awm nasain hnathawhna boruak a tichhia nia a hriat thu adviser to chief minister TBC Lalvenchhunga chuan a sawi.
Junior Engineer Service Association of Mizoram (JESAM) chuan April 11 khan Aizawlah general conference vawi 7-na an hmang a. Adviser to CM (Finance & Planning) TBC Lalvenchhunga hian hmanpuiin, sawrkar hnathawk zinga service rivalry awm nasain hnathawhna boruak a tichhia nia a hriat thu leh development works hrim hrimah kalphung siamthat ngai tam tak a la awm nia a hmuh thu a sawi.
A tawnhriat neih atangin JE-te chu an dinhmun leh hnathawh a hriatthiam pui tih a sawi a. A hmuna a tak taka hna thawktu an ni a, harsatna a awm changin dem hmasak an hlawh thin tih thlenga a hriatpui thu a sawi a. Eirukna laka fihlim chu mimal taka a thil ngaihpawimawh ber pawl a ni, tiin, chumi kawngah chuan sawrkar thawhpui turin a sawm tih a sawi a ni.
JESAM hi kum 2015-a din a ni a, an member-ah hian junior engineer, diploma leh non-diploma, BE leh ME thlengin an awm. Works department hrang hrang – PWD, P&E, PHE, Irrigation leh department hrang hrangah an awm a. Works department bikah sanctioned post 733 an nei a, service lai 520 an awm.