ASF vangin sanghal a thi tih finfiah

ASF vangin sanghal a thi tih finfiah
Tunlaia Mizorama vawk engemawzat suat tawhtu African Swine Fever chu ‘vawk family’ ami sanghal pawhin a tuar a, an thihpui tih finfiah a ni.
AH & Vety department hotute sawi danin, Kolasib district-a Saipum ramah tunhnai khan sanghal thi hmuh a ni a. Hmuh a nih hian a thihna a lo rei deuh tawh a, a tisa a lo filh hman a ni. A ruh atangin an zirchiang zui ta tho a, laboratory-ah a ruha thling (ro) atangin an endik a, ASF kai ngei tih finfiah a ni. Thling atanga heti lam zawnga an vawikhat endikna tur a nih avangin Selesih-a Veterinary College lamah pawh a sample hi thawn a ni a, an ni pawh ASF a kai tih hi an lo finfiah ve leh a ni.
Saipuma sanghal thi-in ASF a kai tih finfiah a nih avang hian Kolasib district magistrate chuan September 27 khan thupek tichhuakin, danin thuneihna a pek angin, Kolasib district-ah mi tumahin ramsa an pelin an tihlum tur a ni lo tih a sawi a. Ramsa a repin emaw a hringin emaw tumahin dan kalhin a rukin an zuar tur a ni lo, tiin, tumahin ramsa leia ei lo turin a ti bawk.
He thupek hi chhuah a nih atanga ni 60 chhung a huam dawn a, dan bawhchhia chu hrem an ni dawn tih a sawi a ni.
Tun tuma Mizorama ASF hri darh leh hi kumin March 20 vel atanga intan a ni a, tun thlengin he hri avanga vawk thi 9378 awm tawhin, a hri kai nia hriat avanga tih hlum (cull) 3454 an awm tawh a ni.