African Swine Fever (ASF) vangin Mizoram hmun hrang hrangah harsatna an tawk mek a, kuminah he hri vang hian Mizoramin vawk 4411 a chan tawh.
AH&Vety department-in an chhinchhiah danin kuminah ASF vangin vawk 3366 a thi tawh a, ASF vang hian vawk 1045 suat (cull) a ni tawh bawk.
District pali- Mamit, Lawngtlai, Siaha leh Lunglei district-ahte he hri hi kuminah finfiah a ni tawh a, district pali-a khaw 46-ah ASF hi a leng.
Vanneihthlak takin district dangah finfiah a la ni lo a, a lenna district-ah kal mar mah se hmun dang a kai rih lo.
Siaha leh Lawngtlai district te’n an tuar nasa a, Siaha district-ah vawk 1930 thi tawhin, vawk 660 tihhlum a ni tawh. Lawngtlai district-ah vawk 1245 a thi tawh a, vawk 315 tihhlum a ni tawh.
Kumina he hri hmuh hmasakna Mamit district-ah a nasa zui rih lo a, vawk a thih belh nasa rih lo. Lunglei district pawh hi a nasa vak lo a, hmun hnihah he hri hi finfiah niin, vawk 21 a thi tawh a, vawk 22 tihhlum a ni tawh.
May ni 1-ah khan vawk 107 a thi a, ni khat chhunga vawk thi zat hi a tam tham viau mai.
ASF hi kuminah March thla tawp lamah finfiah a ni a, a la rei lo ngaihtuahin vawk hi a thi hnem tawh. Mahse a lenna hmun hi a zau vak rih lo a, hmun hrang hrangah a kang kai rih lo hi AH&Vety department lam chuan thil lawmawmah an ngai.
ASF vangin vawk 4400 chuang chan tawh
Get real time updates directly on you device, subscribe now.
Prev Post
Next Post