ASF vangin vawk thih belh zel

African Swine Fever (ASF) vangin vawk a thih belh zel a, March thla tawp lamah he hri vang hian ni tin vawk a thi. Kuminah he hri vang hian Mizoramin vawk 600 chuang a chan tawh.
AH&Vety department-in an chhinchhiah danin, kuminah ASF vangin vawk 549 a thi tawh a, vawk 107 tihhlum/suat a ni tawh bawk.
Kumina ASF vanga vawk thi report hmasak ber chu March ni 21-a mi a ni a, Mamit district-a Zawlnuam leh Lawngtlai district-a Lawngtlai khawpui hmun thenkhat leh Bungtlang South-ahte ASF a leng tih hi finfiah a ni tawh.
Veng leh khua hi 13 a tibuai mek a, heng hmun 13-ah bak hi chuan ASF hi finfiah a la ni rih lo hlauh. ASF vanga vawk thi tawh 549 zinga 76 chu Zawlnuam-a mi a ni a, a dang zawng chu Lawngtlai district-a mi a ni.
Vanneihthlak takin hmun dangah he hri hi hmuh a la ni lo a, mahse finfiah a nih tawhna hmunah hian vawk a thih belh zel. Thawhlehni khan Zawlnuam-ah vawk pathum a thi a, Lawngtlai khawpuiah 28 a thi.
Nikum December ni 23-a vawk a thih hnuah, December ni 24 atangin ASF vanga vawk thi a awm ta lo char char a, ni 80 chuang Mizoram a him hnuah tun hnaiah he hri hi hmuh a ni leh a ni.