Asia rama mihausa ber Gautam Adani

Gautam Adani chuan Reliance Industries head Mukesh Ambani khumin a listed company apple atanga airport conglomerate thlenga stock price a san avangin Asia khawmualpuia hausa ber nihna a chelh ta.
Adan hausakna hi $111 billion hu niin khawvel pumah hausak lamah 11 na a ni mek a. Ambani hausakna chu $109 billion ni thungin khawvel pumah 12-na a ni thung niin Bloomberg Billionaires Index chuan a tarlang.
Kar kalta Zirtawpni khan US brokerage Jefferies tena Adani Group company te chuan kum sawm chhungin capital expenditure $ 90 billion kalpui an tum an tih hnuah Adani Group share chu 14% in a sang a ni.
Market value a Rs 84,064 crore belh a nih hnuah Adani group listed firm 10 lai market capitalisation chu Rs17.51 lakh crore ah a kai chho a. Chuvang chuan first generation entrepreneur Adani chuan Europe fanga zin mek Ambani chu a khum ta a ni.
Kum 61-a upa Adani chu kum 2022 khan global economy pandmeic avanga a than theihloh laiin Asia mihausa ber a lo ni tawh a. Mahse, January 2023 khan a $21 billion conglomerate India rama airport te, private sector port lian ber te, media giant New Delhi Television te, renewable energy firm lian ber te, data centre leh holding pawimawh tak tak nei te chu short-seller Hindenburg Research avangin a hmingvhhe hle a.
Hindenburg chuan Adani business empire chu inbumna hmanga din a tihsak a, chuvang chuan a group stock price chu nasa taka tlahniamin a hniam lai berin $150 billion chuang hlohin top 20 billionaire atanga nekchhuahin a awm zui a ni. Kum 2022 khan Adani chuan Ambani khumin Asia khawmualpuia hausa ber nihna a lo chelh tawh bawk.
Hindenburg Research puhna chu Adani group chuan hnawlin strategy tha zawk nen an insiamrem thu sawiin chung zingah chuan leiba tihhniam te, founder share pledge tihhniam te leh sumdawnna te hlawmkhawm zawkin an siam bawk a. An strategy chu kalfuhin March 31 a fiscal year tawp rual khan sum hmuh record an siam zui a ni.
Thla nga hnuah Adani chuan Ambani chu hausa lamah a khum leh ta a. January thla khan Adani chuan Ambani chu thla 12 dawn hnuah a lehpel a, a hnu lawkah a pha lo leh a, tunah erawh a khum leh ta a ni.
Kum 2024 ah Adani hausakna chu $26.8 billion laia a pun laiin Ambani hausakna chu $12.7 billion in a pung thung, tiin Bloomberg Billionaires Index chuana tarlang.
College kalchhuak lo Adani hian diamond industry ah sumdawn tanin chumi hnuah a unaupa plastic factory ah a thawk leh a. Kum 1988 khan ama hmngin company a din a, comodities sector lamah import-export operation kalpuiin a tilian zel a, hmalakna thar a neihbelh zui zel a ni.
Tun hnai kum 10 chhungin a hausakna a pung thur thur a, kum 2014 khan ahausakna $5 billion lek a nih laiin kum 2022 kum tawp khan a hausakna chu $121 billion ah a kai hman tawh a. September 2022 khan khawvela mihausa ber pahnihna dinhmun a lo chelh tawh bawk.
Kar kalta khan Adan chuan annual report a siamah Adani group hmalam hun chu a duhawm thu sawiin, “Kan hmalam kawngah theihna sang tak a awm mek a, Adani group hi tun hma zawng aiin a chakin a ngelnghet tawh zawk” tiin a sawi.