Exit Poll hi ‘a suak‘ a ni : Jairam Ramesh

Exit poll chu ‘a suak’ tia sawiin Congress te chuan election a rigging kalpui justify tir tumna leh Prime Minister Narendra Modi an INDIA bloc worker te rilru tihhnual a tum nana a ‘psychological games’ a ni tiin an sawi.
Congress general secretary Jairam Ramesh chuan Prime Minister in meeting hrang hrang kova ‘sorkar thar’ ni 100 agenda tur ngaihtuaha brainstorming session tehial a neihpui chu nataka sawiselin bureaucracy leh administrative structure te a prime minister leh ngei dawn tia pressure a pekna tactic a ni a ti bawk.
“Hengte hi mind games vek a ni a – thuneihna ka chang leh dawn a, Prime Minister ka ni leh dawn a ni a tihna a ni” a ti a. He rama bureaucracy leh administrative structure te chu a vauna a ni a, civil servant te chuan hengah te hian timna leh hlauhna nei hauh lovin an mawhphurhna vote dik leh fel takin an chhiar kan beisei tlat a ni, tiin Ramesh chuan a sawi.
Ramesh chuan June 1 tlai lama exit poll tihchhuah chu ‘a suak’ tia sawi bawkin fing leh fimkhur tak chunga June 4 atanga tla vang vang tawh turin an ruahmansa vek a ni tiin a sawi bawk a.
“Heng thil tin te hi kalchhuak tur Prime Minister Narendra Modi leh kalchhuak tur Home Minister Amit Shah tena psychological game an khelh vek a ni. Home Minister kalchhuak tur hian nimin khan District Magistrate leh Collector 150 phone in a bia a ni. Exit poll result hian a takah engmah nghawng a nei lo” tiin Congress leader chuan a sawi bawk.
June 1 a exit poll tihchuahah Prime Minister chuan a zawnin term thum a chelh dawn tiin BJP kaihhruai NDA chuan Lok Sabha poll ah majority hneh takin an chang dawn an ti a.
India Today-Axis My India chuan BJP kaihrhuai alliance tena seat 361-401 an la turah a dah a, Opposition INDIA block ten seat 131-161 an la turah a dah a. ABP-C Voter te chuan NDA ten seat 353-383 la tur leh INDIA bloc ten 152-182 la turin a dah thung.
Exit poll na taka sawiselin Ramesh chuan State thenkhatah chuan NDA te chu State a seat awmzah aia tam te an laktir vel tiin a sawi a.
“INDIA ‘janbandhan’ party ten meeting kan nei a, state tin te analysis kan nei vek a, INDIA janbandhan ten seat 295 aia tlem kan la dawn miah lo” tiin Ramesh chuan a sawi a.
“Rigging an kalpui justify tumna, EVM tihchingpen justify tumna leh Congress worker leh INDIA janbandhan workers te rilru tihhnual tumna a ni. Kan hlauthawng der lo va, kan zam hauh lo va, June 4 ah result puan hunah exit poll nena a danglamna inhmu mai ang” tiin Congress general secretary chuan a sawi bawk a. Heng te hi professional exit poll ni lovin political exit poll a ni, tiin a sawi bawk.
Ramesh chuan Congress treasurer leh senior leader Ajay Maken chuan Assiatant Returning Officer (ARO) table hnaiha candidate counting agents te awm tir phalloh chungchang dodalna a thlen thu a sawi bawk a.
“Maken an he issue hi a thlen a, CEO of Delhi chuan chhanna a la pe lo, candidate tena hlauhthawn an neih vang a ni a. Postal ballot chhiar dan chungchang leh Election Commission in a methodology a thlak dan chungchang te pawh kan thlen a ni” tiin Ramesh chuan a sawi.
Congress chuan heng issue hrang hrang te hi EC hnenah kan thlen a, ni 77 cyhhungin compalint 117 kan thehlut a, chung zinga 14 chu PM lakah a ni a ti bawk a.
“EC atangin chetlakna rintlak kan la hmu hauh lo. Constitutional body a ni a, tanbik leh thleibik nei lo professional taka che in an laka rinna kan nghahna tur chu an hna pawimawh ber a ni” tiin a sawi bawk a.
“Postal ballot chungchangah pawh EC hnenah ngenna kan siam a. EC pawhin party tin te hun min pek kan beisei bawk a, ruling party hmanrua ang in an awm tur a ni lo. EC in hun min pek ngei pawh kan beisei” tiin Congress general secretary chuan a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More