Assam CM min puhna a dik lo – Home secretary,

Assam sawrkarin police commando camp a sak avanga forest dan a bawhchhiat chungchangah Mizoramin dik lo taka an ram a rawn nek vang tia a sawi chu thu belhchian dawl lo a ni tih Home secretary H Lalengmawia chuan a sawi. Home secretary sawi danin, Assam sawrkar hian Hailakandi district chhunga Damcherra khaw bula police commando camp a siam mekna chu forest reserve chhung a nih avangin, Ministry of Environment Forest & Climate Change chuan Forest Conservation (Amendment) 2023 a bawhchhia tih a hrilh a. Assam CM chuan Union minister of EFCC hnenah ex post facto-in forest clearance hectare 44 a zau a dil tih a sawi thu chanchinbu lamah tarlan a ni. Commando camp an sak chhan hi Mizoram lam atanga ramri nek rukna (encroachment) awm thin tihtawpna atana hmalakna a ni tih a sawi thu a sawi chhawng bawk.
“Commando camp hi an sa ngei niin hriat a ni a. FC Act hnuaiah clearance an la lo tih hriat a ni. Clearance la lo hian hetih hun laia Assam PCCF, tuna special chief secretary (Forest) MK Yadavva hian camp sak phalna hi a lo pe ve mai niin a lang a. FC Act kalha phalna a lo pe nia hriat a nih avangin MoEFCC regional office Shillong chuan MK Yadavva hnenah hian show cause notice a pe nia hriat a ni. Commando camp sak hna thawh mek pawh MoEFCC hian a tihtawp tir nghal a ni,” a ti.
Forest clearance chungchangah Assam sawrkar leh Ministry of EF&CC inkar thil a nih laiin, Mizoram hmer tel ve hram tum leh, ‘encroachment’ tih tawngkam Assam CM-in a hman erawh chhanlet ngai a ni tih H Lalengmawia hian a sawi.
Mizoram leh Assam ramri chu la chinfel loh a ni a, chinfel tuma inbiak mek lai a nih avangin, a tu ve ve tan pawh ‘min rawn encroach’ tih chu hman a remchang lo tih sawiin, “A chhan chu, state pahnihin kan pawm dun thlap ramri fel tak nei tawh ni ila, chumi pela kan kal chuan, ‘encroach’ chu a tih theih ang. Tunah rih chuan a hun lo kan ti a, pumpelh tha kan ti,” a ti.
Zawhna chhangin, tuna commando camp sak lai chu Mizoten kut kan thlak thinna leh kan luah lai mek thlang lam daih, ramri chungchanga state pahnihin ‘status quo’ an puanna pawnlam daih ala ni tih Home secretary hian a sawi a. Chutihrualin, ramri chin sawi danah chuan 1875 anga sawi chuan Mizoram chin tih theih, 1933 ramri ang chuan Assam lamin an ta tia an chhal a ni thei tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More