Assam nena ram inchuhnaah Hauh chin chhung zirchian tum

On Jan 21, 2023 30 0

Assam nena ram inchuh meka Mizoram-in ram a hauh chin awm dan leh a chhunga chengte chu sawrkarin a zirchiang turin Study Group a siam.

Assam nena ramri buai chungchanga Mizoram sawrkarin a din Boundary Committee chu a vawi 5-na atan an vice chairman, Home minister Lalchamliana kaihhruaiin Zirtawpni khan an thukhawm a. Ramri depa dan leh thupek kenkawh leh tunhnaia Kolasib district depa thil thleng pali chu IGP (Hqrs) John Neihlaia’n a report a. 2022 November 16 & 17 a Guwahati-a Mizoram leh Assam aiawhte inbiakna report chu he inbiaknaa tel, Boundary Committee member secretary, Home commissioner H. Lalengmawia’n a report bawk.

Report pahnih ngaihthlak hnu hian inbiak hnuhnung bera thu intawm, joint statement chhuah chungchang sawiho niin, JAC on IRLF bakah member dangte pawhin November 16 & 17 a inbiakna thu hawn leh thu intawm chu tha an tih thu an sawi a ni.

He thu intawma point pakhat – Mizoram sawrkarin ramri nia kan pawm huamchhunga khua awm, an huamchin, a geo spatial extent, heng hmuna cheng mihring chanchin leh hnam awm (ethnicity) chanchin leh a dangte chu thla thum chhunga lakkhawm a, Assam sawrkar hnena thehluh chungchang tihhlawhtlin nan rawtna siamte an sawiho hnuin, hemi buaipui tur Study Group siam rel a ni.

Convenor ah Prof. J Doungel, Mizoram University, member secretary ah Lalthiamsanga Sailo ruat a ni. Study Group ah hian Land Revenue & Settlement, Environment, Forest & Climate Change leh MIRSAC bakah a tul angin member dang ruat tura tih a ni.

Home minister chuan Mizoram leh Mizo mipuiin ramria kan pawm tlan chu 1875 ang a ni, tiin, “Hei hi 2022 November 17 inbiaknaah pawh kan tan chhan a ni. Ramri chungchangah leh hnam thilah kan tanrualna leh inlungrualna hi a lawmawm,” a ti.

Thutkhawmah hian Law & Judicial minister TJ Lalnuntluanga, chief secretary Dr Renu Sharma leh Home department hotute bakah Boundary Committee member – political party leh NGO aiawhte leh JAC on ILRF aiawh an tel a ni.

Ramri chungchangah hian tunhnaiah state pahnih high level delegation inbiak tum thum neih a ni tawh a. 2022 August 5 ah Aizawlah a hmasa ber neiin, August 9-ah Aizawlah bawk neih a ni. A tum thumna hi Guwahati ah November 17 khan neih leh a ni.