Assam Police bo zawnnaah police hotuin lawmthu sawi

Mizoram MLA inthlanpui laia duty tura Mizorama rawn kal 9 Assam Police Bn ami constable Sabin Nath (42) chu an duty-na tur Ngopa a thlen hnua bo chu a awmna chin hriat a la ni lo.
Constable Sabin Nath hi November 5 khan Govt. Middle School-II Ngopa, Saitual district atangin police uniform ha chungin a chhuak a, a chin hriat zui a ni tawh lo. Mizoram Police leh Ngopa khawtlang bakah thenawm khaw thenkhat ten ngawrh takin an zawng a, police uisathiamte pawh Aizawl atanga chah an ni a, amah emaw a thawmhnaw thenkhat emaw pawh hmuh zui tur a awm lo a ni.
A bo hlimchhawn hian Assam lam atangin police hotute pawhin Ngopa hi an thutchilh a, Mizo dana ni sarih zawn a nih hnu ah hmuh a nih loh avangin a nawlpuia a zawn tih tawp a ni.
Kar kalta khan Assam Police IGP (Training & Armed Police) & Communication Akhilesh Kumar Singh chuan Ngopa hi a tlawh leh a, Saitual SP Pukhraj Kamal leh addl. SP F Lalbiakzauva ten an tawiawm a ni. Ngopa khawtlang hruaitute kawmin, an sipai bo zawnnaa hma an lo lak tawhna te fakawm a tih thu a sawi rualin, theihtawp chhuaha bo zawn hna thawk zel turin a sawm a ni.