Assembly hnalak cancel tum lo Cancel phutin punkhawm tum

Mizoram Legislative Assembly Secretariat hotute chuan tunhnaia an hnalak chu dan dik thlapa kalpui a nih avangin cancel leh chi ah an ngai lo tih an sawi a. He hnalak cancel leh phuttu zirlai pawl pawh an dinna ngaiah dingin July 7 hian Assembly House kawtah punkhawm an tum.Mizoram Legislative Assembly Secretariat chuan an hnuaia hna hrang hrang – assistant, translator, UDC leh LDC lak hi ‘The Mizoram Legislative Assembly Secretariat (Recruitment and Conditions of Service) Rules 1995 as amended’ ang thlapa lak a ni tih a sawi a. Hnalakna atan hian dan angin chanchinbu – Mizo Aw leh Dingdi ah 2023 January 25 & 26 ah advertisement chhuah a ni a, form thehluh hun tawp atan February 24 bituk niin, LDC bik hi a tirah post 8 a ruah laiin sum inrenchemna avangin post 5 lak tura tih a ni a, sum dinhmun a ziaawm hnu leh, a bikin Assembly Committee hrang hrang an active chhoh tak avangin post 8 lak zawk nise, tia rel leh a ni a. Corrigendum siamin February 22 khan Mizo Aw leh Dingdi ah vek advertisement chhuah leh a ni, tiin a sawi.
Application form thehluh hun tawp hi March 20 thleng pawhsei a ni a, post 8 lakna atana application thehluh hun tawp chhuah a tlai tak chhan hi Budget Session lai a nih bakah Session zawhah Session kaihhnawih hna tam tak a awm avangin, chu lamah chuan ni engemawzat an inburbun a, advertisement chhuah leh hi a tlai ta hret tih Secretariat hotute hian an sawi. Heti chung hian mi 2369 in dilna an thehlut a, extension chhuah tlai leh hian hna diltu zat lamah nghawng a nei lo nia a lan thu an sawi bawk.
Hna hrang hrangah hetiang hian form la chhuak zat leh exam tur ang exam zo (complete) chu – translator: 827 -159, assistant: 2540 – 453, UDC: 1610 – 310, LDC: 3055 – 712 a ni tih sawiin, Mizoram Legislative Assembly Secretariat hi Indian Constitution Article 187 hnuaiah secretarial staff hrang nei tura tih a ni a, recruitment rules leh service condition pawh he Article hnuai veka thuneihna nei a nih angin, tha a tih angin a kalpui thin tih a sawi a ni.
‘Mizoram Legislative Assembly Secretariat-a hnalak chungchanga pawl thenkhatin hma an la hi thil tha duhna a nih avangin lawmawm kan ti a. Nimahse, an duh dan anga appointment hi cancel leh a nih chuan dan ang thlapa lak an nih avangin court-ah kal se Secretariat lam hian kan hneh dawn lo reng reng a. Hei vang hian cancel leh chi ah kan ngai lo,’ Assembly Secretariat hian a ti. Exam-a marks leh mahni answer paper-te pawh a duh tan RTI hmanga dil theih reng a ni tih a sawi.
Assembly Secretariat lam insawifiah hnu, July 5 chawhnu khan Mizo Zirlai Pawl, Mizo Students’ Union, Hnampual Zirlai Pawl leh Aizawl City College Students’ Union chu thukhawmin, Mizoram Legislative Assembly Secretariat hnalakah chhungkhat laina induhsak bikna a awm avanga cancel tura ngenna in awmzia a neih loh chuan July 7 zing dar 8.30 hian Mizoram Assembly House kawtah punkhawm nise, an ti a. Mizo zirlai zawng zawng leh thalai hna zawng mekte tel vek turin an sawm a ni.