Zoram tana zalenna sualin an rammu ve ve a,
Mizo National Army-ah an tel thin. Hnam Sipai tia sawi Mizo National Army-ah hian an tel ve ve a ni ringawt lo a, battalion khatah an awm dun a, Z battalion ve ve an ni. MLA an ni dun leh a, mahse an party a hrang.
1966 atanga 1986 thlengin Zoramin zalenna a sual a, zalenna suala rammute zinga engemaw zat chu party politics-ah an inhmang zui. MLA ni thei erawh pahnih chauh an awm ta rih. November ni 4-a result puan, Mizoram inthlanah khan Hnam Sipai hlui pahnih an tel; Dampa biala tling Lalrintluanga Sailo, MNF leh Aizawl West III-a tling VL Zaithanzama, ZPM te.
Sajek tlang dungah Z Battalion-ah anni pahnih hi an awm thin a, Tactical Headquarters-ah an awm thin.
“Rammut laiin kan inkawm daih tawh a, battalion khatah kan awm thin a,” tiin VL Zaithanzama chuan Lalrintluanga Sailo te nen tun hma atanga inkawm tawh an nih thu a sawi a, “Operation-ah chuan kan tel dun ka hre lo, kan tel dun lo a ni mai thei,” a ti.
Anni pahnih hi 2018-23 term-ah khan MLA an lo ni dun tawh a, mahse term liam mekah hi chuan anni pahnih bakah zalenna suala rammu thin an awm; deputy chief minister Tawnluia kha Hnam Sipai a ni thin a, army chief te pawh a ni thin a, home minister thin Lalchamliana kha Hnam Sipai a ni thin bawk. Chief minister thin Zoramthanga kha zalenna suala rammu thin a ni bawk a, ani hi chu sipai lamah ni lovin civil lamah a awm thin. Term tharah chuan zalenna suala rammu pahnih chauh an awm dawn.
2008-2013 termah khan zalenna suala rammu hi pakhat, PC Lalthanliana a awm a, 2008-13 chhung khan minister a ni. 2013-18-ah pawh ani hi minister a ni leh.
Zalenna sualtute hi 1986-ah an rawn haw a, 1987 inthlan atangin an tel ve nghal. Hemi hma hian 1986 hmaa rawn hawte pawh politics-ah telin MLA te an lo ni tawh thin tho a, mahse MLA ni hi an tam lo.
-- Advertisement --
Zalenna sualtu, remna ziah hnua MLA-te
41987-ah Laldenga, Zoramthanga, Tawnluia, Lalrinchhana, Rualchhina, Thankima, Lalkhawnghinga, K Vanlalauva, Lalrinmawia leh Chawngzuala te.
41989-ah Laldenga, Zoramthanga, Tawnluia, Lalrinchhana, K.Vanlalauva, Lalrawnliana leh Rualchhina te.
41993-ah Zoramthanga leh Lalrinchhana te.
41998-ah Zoramthanga, Tawnluia, Lalrinchhana, Rualchhina leh K Vanlalauva te.
42003-ah Zoramthanga, Tawnluia, Lalrinchhana, K.Vanlalauva leh D Thangliana te.
42008-ah PC Lalthanliana.
42013-ah PC Lalthanliana
42018-ah Zoramthanga, Tawnluia, Lalchamliana, Lalrintluanga Sailo leh VL Zaithamzama
42023-ah Lalrintluanga Sailo leh VL Zaithanzama