Assembly speaker hlui thihnaah doctor lemchang puh

Assembly speaker hlui thihnaah doctor lemchang puh
Cardiologist lemchanga Narendra John Camm-a anga inlan, Narendra Yadav-a leh Bilaspur damdawi in chu kum 19 liam taa Chhattisgarh assembly speaker hlui, Rajendra Prasad Shukla-a thihnaa mawhphurtua puh an ni tih Pathianni khan thuneituin a sawi.
Inrinni zan khan Yadav-a leh damdawi in lakah hian mi thihnaa mawhphurtua puh bakah Indian Penal Code-a bung hrang hrang tlawhchhanin tualthat, mi bum leh lemchanga puhin FIR thehluh a ni.
Tun hnaia Damoh, Madhya Pradesh-a mi a zai hnu pasarih an thih hnua man, Yadav-a hian Shukla-a hi mi mal damdawi inah a zai a, a hnuah speaker hlui hi a thi zui niin Bilaspur Senior Superintendent of Police (SSP) Rajnesh Singh chuan a sawi.
Kota bialtu Congress MLA Shukla-a hi kum 2006 khan Bilaspur-a mi mal damdawi inah a thi a. Chhattisgarh legislative assembly-ah kum 2000 leh 2003 inkar speaker niin a hmasa ber a ni.
Speaker hlui fapa, Pradeep Shukla chuan tun hnai khan police hnenah Yadav-a hi a pa an dahna damdawi in nen khan inzawmna an neih thu a thlen.
“Yadav-a hian ka pa lung a zaisak a, ni 18 chhung ventilator nena an tan hnuah August 20, 2006 khan a thi a. Damdawi in hian sorkar atangin ka pa an enkawlna man Rs nuai 20 an dawng a ni,” a ti.
Pradeep Shukla-a hian Yadav-a chungchang leh Damoh damdawi ina thihna thleng leh man a ni chu chanchinbu atanga a lo hriat thu a sawi.
Police chuan Yadav-a degree chu a lem niin Indian Medical Council/Chhattisgarh Medical Council-a a inziah luhna pawh a lem vek tih an chhui chhuak tawh tih SSP Singh chuan a sawi.
Engmah finfiahna chiang nei lovin damdawi inin an lo chhawr leh assembly speaker hlui an lo zaitir damdawi in thiam loh a nih tel thu a sawi.
Yadav-a hi Mission Hospital, Damoh-a lung natna nei a zai hnu mi pasarih an thih hnuah miin National Human Rights Commission (NHRC)-ah thlen niin man zui a ni.
Kar hmasa khan Indore-a employment consultancy firm chuan Yadav-a hian kum 2020 leh 2024 khan a resume vawi thum thehlutin hna a zawng a, damlo sang chuang a zai tawh niin a insawi tih an puang.
Phek kuaa chhah kum 2024-a resume a thehluhah hian Yadav-a hian senior cardiologist a nih thu leh Birmingham, Britain-a cheng niin a insawi a. Lung na sang chuang a zai tawh a, heng zingah hian 18,740 chu ‘coronary angiography’ niin 14,236 chu ‘coronary angioplasty’ a ni tih director hian a sawi.
Yadav-a hian phiar a ni tih sawiin a degree-te chu a rintlak tawk tih a sawi.