ATEEZ-in No.1 album pahnih an nei ta

ATEEZ-in No.1 album pahnih an nei ta
K-pop group ATEEZ album thar ‘GOLDEN HOUR: Part.2” chu Billboard 200 (albums) chart No.1-ah a debut a, he chart-a an album No.1 kai thei pahnihna a ni. Hetihrual hian Linkin Park, Jin leh Rauw Alejandro te pawh top 10-ah an debut a, ENHYPEN album ‘ROMANCE: UNTOLD’ pawh top 10 atanga chhuak tawh kha, an tlangzarh nawn leh a, top 10-ah a rawn kir ve leh ta bawk. Tihian tunkar Billboard 200 chart top 10-ah K-pop album pathum a lang a, hetiang hi he chart history-ah a vawi khatna a ni.
Billboard 200 (albums) chart hi kar khat chhunga US-a album hralh tam dan atanga chhutin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
ATEEZ ‘GOLDEN HOUR: Part.2’ hi kar khat chhungin 1,84,000 hralhin, chung zinga zinga 1,79,000 chu album tak tak hralhna a ni a, streaming atangin 5,000 (on-demand official stream maktaduai 6.43) a ni bawk. ATEEZ album dang ‘THE WORLD EP.FIN: WILL’ chu 2023 khan chart No.1 a lo kai tawh bawk a, hei bakah hian chart top 10-a lang thei album dang pali nei tawh bawkin, ‘GOLDEN HOUR:Part. 2’ chu an top 10 album parukna a ni ta a ni.
‘GOLDEN HOUR:Part.2’ a hlate hi Korean deuh vek a ni a, English ni lo deuh vek hla awmna album he chart-a No.1 thei 26-na a ni a, kuminah chuan a pathumna a ni a, kumina English hla ni lo he chart-a No.1 te hi pawh K-pop album tho niin, Stray Kids ‘ATE’ leh TWICE ‘With YOU-th’ te an ni. English hla ni lo deuh vek awmna album he chart-a No.1 thei album 26 zinga album 17 chu Korean album niin, Spanish album panga leh Italian leh French album pakhat ve ve bakah, Spanish, Italian leh French inpawlh pahnih a awm bawk.
Linkin Park pawh chart-ah an rawn lang ve leh ta a, tun kum sarih chhunga an studio album tlangzarh leh hmasak ber ‘From Zero’ chu No.2-ah a debut a, he album hi 97,000 an hralh thei a, chung zinga 72,000 chu album tak tak hralhna niin, streaming atangin 24,000 (on-demand official stream maktaduai 32.18) niin, album-a hla mal hralhna atangin 1,000 a tling tei bawk. ‘From Zero’ hi Linkin Park album he chart top 10-a lang thei 12-na niin, an member thar Emily Armstrong (co-lead vocals) leh Colin Brittain (drums) te nena an album siamho hmasa ber niin, an vocalist, 2017-a boral ta Chester Bennington leh an drummer 2018-a boral ta Rob Bourdon te tel lo a an album hmasa ber a ni bawk.
He chart-a kar thum No.1 taw Tyler, the Creator album ‘CHROMAKOPIA’ chu 81,000 hralh lehin No.1 atangin No.3-ah a tawlh ve ta bawk.
BTS member Jin solo debut project ‘Happy’ chu No.4-ah a debut a, 77,000 hralh theiin, chung zinga 66,000 chu album tak tak hralhna niin, streaming atangin 8,000 (on-demand official stream maktaduai 10.53) leh album-a hla mal hralhna atangin 3,000 a tling thei bawk. ‘Happy’ hi Jin tan he chart-a solo artist anga a lanna hmasa ber niin, BTS member pasarih te chu he chart top 10-ah hian solo artist angin an lang kim ta a, a BTS ang pawhin chart top 10-a lang thei album pasarih nei tawhin, chung zinga paruk chu No.1 a kai vek bawk.
Chart No.1 hlui Sabrina Carpenter ‘Short n’ Sweet’ chu 72,000 hralhin No.3 atangin No.5-ah a tawlh ta.
Rauw Alejandro album ‘Cosa Nuestra’ chu 67,000 hralhin No.6-ah a debut a, he chart top 10-a a lan vawi khatna a ni. A album hralh atanga 66,000 chu streaming (on-demand official stream maktaduai 87.66) niin, album tak tak hralh chu 1,000 a ni. He album-ah hian Bad Bunny, Laura Pausini, Romeo Santos leh Pharrell Williams te nena an thawhhona hla te pawh a awm.
ENHYPEN album ‘ROMANCE: UNTOLD’ chu tuaihnumin, bonus track pahnih da belhin an tlangzarh thar leh a, 54,000 hralh lehin No.7 a rawn kai thar leh a, 51,000 chu album tak tak hralhna niin, streaming atangin 3,000 (on-demand official stream maktaduai 4.45) a tling thei. He album hi July thlaa an tlangzarh kha niin, No.2 te pawh lo kai ve zak zak tawh a ni.
Gracie Abrams ‘The Secret of Us’ chu 50,000 hralh lehin No.4 atangin No.8-ah a tawlh a, Billie Eilish ‘Hit Me Hard and Soft’ chu 49,000 hralh lehin No.5 atangin No.9-ah a tawlh a, Chappell Roan ‘The Rise and Fall of a Midwest Princess’ chu 43,000 hralh lehin No.6 atangin No.10-ah a tawlh ta bawk.