Box office-ah ‘Gladiator II’-in ‘Wicked’ a ngam lo

Box office-ah ‘Gladiator II’-in ‘Wicked’ a ngam lo
Tun weekend kalta khan ‘Wicked’ leh ‘Gladiator II’ ten cinema hall ticket hralhna atangin sum an la lut tha dun thawkhat a, North American box office-ah ‘Wicked’ a che tha zawk a, international market-ah erawh ‘Gladiator II’ a chetha zawk.
Tun weekend kalta khan ‘Wicked’ hian cinema hall ticket hralhna atangin dollar maktaduai 114 a la lut a, North American box office No.1 a ni a, US pawna a lak luh nen chuan dollar maktaduai 164.2 a tlin nghal der.
‘Gladiator II’ hi ramdang aiin US-ah kar khatin an tlangzarh tlai zawk a, tun weekend kal khan US-ah an tlangzarh a, opening weekend-ah cinema hall ticket hralhna atangin dollar maktaduai 55.5 la lutin, US pawnah dollar maktaduai 165.5 la lut tawhin, a vaiin dollar maktaduai 221 a la lut tawh.
‘Wicked’ hi Broadway musical behchhan Jon M. Chu film siam a ni a, zaithiam lar Ariana Grande leh Cynthia Enrivo te channa niin, he film hi a part two pawh an siam nghal a, hei hi chu kum khat hnuah cinema hall-ah an tichhuak ve leh dawn a ni. A film hmasa zawk ‘Wicked’ siam nan hian dollar maktaduai 150 vel an hmang a, marketing nen chuan an sum sen hi dollar maktaduai 200 chuang a ni ang.
Wicked hi a thawnthu bul ber chu Gregory Maguire-a thawnthu ziah behchhan a ni a, Oz a dawithiam chanchin tarlanna niin, Enrivo chu Elphaba lemah changin, Ariana Grande hi Glinda lemah a chang ve thung.
‘Gladiator II’ hi Ridley Scott direct niin, a film siam nan dollar maktaduai 250 vel zet an seng a, a film hmasa zawk an tlangzarh atanga kum 24 hnuah a chhunzawmna hi an tichhuak ve leh chauh a, Paul Mescal, Denzel Wahsington, Pedro Pascal, Connie Nielsen leh Fred Hechinger te channa a ni.
He film-ah hian Mescal chu Lucius Verus II lemah changin, a original film-a Emperor Commodus tupa niin, Lucius chu sala an hralh hnuah Rome-ah gladiator angin a rawn kir leh a, phuba lak tumin a inpuahchah a, Rome ropuina tundin leh a tum dan vel tarlanna a ni.
Krismas film ‘Red One’-in a weekend vawi thumnaah dollar maktaduai 13.3 la lut lehin,No.1 atangin No.3-ah a tawlh a, tihian US-ah dollar maktaduai 52.1 la lut tawhin, US pawna a lak luh nen chuan dollar maktaduai 117.1 a tlin tawh. He film hi dollar maktaduai 250 senga siam a ni a, kar thum chhunga a sum lak luh en hian an hloh nual dawn niin a lang.
Box office top 10:
1 Wicked $114,000,000
2 Gladiator II $55,500,000
3 Red One $13,284,603
4 Bonhoeffer: Pastor. Spy. Assassin $5,120,013
5 Venom: The Last Dance $4,000,000
6 The Best Christmas Pageant Ever $3,500,000
7 Heretic $2,233,199
8 The Wild Robot $2,000,000
9 Smile 2 $1,110,000
10 A Real Pain $1,109,000